Бурлыҡ төбө – хурлыҡ

Еңел табыш артынан ҡыуыусылар инде тейешле язаларын алһа ла, “яҡын туғандары”на әйләнеп бөткән кешеләр­ҙең уны шулай “тишек кәмәлә” ҡалды­ры­уына һаман ышанмай һуғыш ветераны.

Хәл былай була. Ике йыл элек ветеран фатир һатып алыу маҡсатында риэлтор агентлығына мөрәжәғәт итә. Үҙен Надя (исемдәр үҙгәртеп алынды) тип таныштырған ханым Василий Иванович менән итәғәтле итеп һөйләшә. Был конторала рәсми теркәлмәгәнлеге һуңынан асыҡланған “хеҙмәткәр” ветеранға фатир эҙләп табып, документтарын тулты­рышырға ярҙам итә.

Надя клиентты контораның башҡа “хеҙмәткәрҙәре” менән дә таныштыра. Дүрт әхирәт оло кешенең ышанысын яулап, уны иғтибар һәм хәстәрлек менән “сорнай”. Ветеранға яңы урынға күсергә, мебель һайлашырға ярҙам итәләр, фатирын йыйыштыралар. Һәм бер ыңғайы уның банк иҫәбендә ҙур сумма аҡсаһы булыуын да асыҡлайҙар.

Артабан еңел табыш артынан ҡыуыу­сылар аҡсаны үҙләштереү маҡсатында, юридик тел менән әйткәндә, енәйәтле килешеүгә инә.

Ҡатындарҙың береһе ветеран менән бергә банкка барып, йәнәһе, уның исе­менә пенсияны күсереү өсөн, социаль карта рәсмиләштерә. Пин-кодты яттан бел­гән ханым пенсионерҙың картаһын үҙенә ала. Һуңынан ветерандың 3,7 миллион һум аҡсаһын картаға бәйле иҫәпкә күсерә.

Йыйылған пенсия аҡсаһы менән аҙаҡ ни булғанлығына төшөнөүе ауыр түгел. Ике ай дауамында йылғыр ханымдар банкомат ярҙамында көн һайын 50-шәр, 100-әр мең һумды ҡулаҡсаға әйләндерә.

“Хәстәрлекле” ханымдар ветерандың һаулығы тураһында ла “ҡайғырта”. Уның аҡсаһына юллама һатып алып, шифаханаға урынлаштыралар.

Артабан хәлдәр нәҡ кинолағы кеүек һүрәтләнә. Шифахананан алыҫ түгел урында Василий Ивановичҡа кемдәрҙер һөжүм итеп, документтарын урлай. Туҡмалған, кәмһетелгән ветеран “яҡын кешеләре”нә мөрәжәғәт итә. Әмәлгә кил­гәндәй, ҡатындарҙың береһе “осраҡ­лы” ғына эргәлә генә ял иткән була. Ул тиҙ генә “ҡыҙыу линия” номерына шылтыратып, аҡса картаһын яптырта.

Артабан мутлашыусылар картаны тергеҙеп, аҡса һурыуҙы дауам итә.

Аппетит ашаған ваҡытта асыла, тиҙәр, өс миллион һумдан ашыу аҡсаны үҙләштергәс тә, мутлашыусыларҙың һыуһыны ҡанмай. Уларҙың икәүһе оло кешенең торлағына йәбешә.

Уға һөжүм иткәндә юҡҡа сыҡҡан до­кументтарҙы тергеҙергә ярҙам итәбеҙ, тип алдап, ҡатындар ветерандан фатир­ҙы бүләк итеү тураһында килешеүгә ҡул ҡуйҙырта.

Әгәр Күп функциялы үҙәк хеҙмәткәре уяулыҡ күрһәтмәһә, бөгөн Василий Иванович аҡсаһыҙ ғына түгел, фатирһыҙ ҙа ҡалған булыр ине. Килешеүҙең хоҡу­ҡи экспертизаһындағы ҡайһы бер һорауҙарҙы асыҡлау маҡсатында үҙәк хеҙмәткәре ветерандың үҙенә шылтырата. Оло кешене был яңылыҡ ғәжәп­ләндерә. Шикле килешеү тураһында шунда уҡ хоҡуҡ һаҡлау органдарына хәбәр ителә. Һөҙөмтәлә 1,1 миллион һумлыҡ фатирҙы бүләк итеү буйынса килешеү туҡтатыла.

Василий Ивановичты иң шаҡ ҡатыр­ғаны – уның ҡатындарҙың береһенә “өйләнгән” булыуы. “Йәш кәләш” ЗАГС-ҡа ла документтарҙы икәүләп тапшыр­ҙыҡ тип иҫбатларға тырыша.

Аҡса барҙа бары ла дуҫ, тиҙәр. Мут­лыҡтары асыҡланғас, ҡатындар ара­һында дуҫлыҡ та бөтә. Улар араһындағы мөнәсәбәт ышанысһыҙ булып сыға, бер-береһен алдап, һатып бөтәләр.

Күптән түгел Учалы район суды, дүрт ҡатынды ла енәйәт ҡылыуҙа ғәйеп­ле тип табып, иректәренән мәхрүм итеү тураһында ҡарар сы­ғарҙы. “Йәш кәләш” ғәйебен тулы­һынса танып, ветеранға урланған аҡсаның 480 меңен кире ҡайтарҙы. Ошоларҙы иҫәпкә алып, суд уны шартлы рәүештә өс йылға иркенән мәхрүм итте.

Ҡалған өс мутлашыусы ғәйептәрен танымай, суд ултырышында үҙҙәрен иркен тота, дорфа яуап бирә.

Суд уларҙың береһен биш йылға дөйөм режим колонияһына оҙатты. Әйткәндәй, тикшереү барышында уның тағы бер алдаҡ эше асыҡлана. Балаларына 14 йәш тулғас, ҡалған ике енәйәтсе йәш әсәләр ҙә ғүмер­ҙәренең өс йыл ярымын колонияла уҙғарасаҡ.