Миәкә менән Бөрйәнгә етеүсе юҡ

Миәкә менән Бөрйәнгә етеүсе юҡ

Башҡортостан Республикаһы Үҙәк һайлау комиссияһының мәғлүмәт үҙәге начальнигы Йыһанур Алтынбаев журналистар алдында сығыш яһап, Берҙәм тауыш биреү көнөндә һайлау бюллетендәрен эшкәртеү комплекстарын (КОИБ-тар), участкаларҙы видеокамералар менән йыһазландырыу һәм башҡа заманса алымдарҙы ҡулланыу тураһында һөйләне.

Йыһанур Рәйес улы шулай уҡ республика Башлығын һайлау буйынса сәғәт 3-кә ҡарата теркәлгән күрһәткестәр менә таныштырҙы. Ошо ваҡытҡа республика халҡының 42 проценттан ашыуы үҙенең гражданлыҡ бурысын үтәгән. Өфөлә был күрһәткес – 35,35 процент. Ҡалалар буйынса иң әүҙеме – Күмертау (47 процент) һәм Салауат (42 процент).

Шулай ҙа, ғәҙәттәгесә, ҡалала йәшәүселәр әүҙемлек йәһәтенән ауыл халҡына етмәй. Мәҫәлән, әлеге сәғәткә Миәкә районында һайлаусыларҙың – 73,9, Бөрйән районында 64 проценты тауыш биреп өлгөргән.

Йыһанур Алтынбаев участка һайлау комиссияларында урынлаштырылған КОИБ-тарҙың, “Мобиль һайлаусы” серверының өҙөклөкһөҙ эшләүе, киләсәктә буласаҡ һайлауҙарҙа был заманса алымдарҙың тағы ла киңерәк ҡулланылыш табасағы тураһында бәйән итте.