Иң яҡшылар эш тапты

Өфөлә “Башҡортостандың стратегик тикшеренеүҙәр үҙәге” автономлы коммерцияға ҡарамаған ойошмаһы өсөн резерв кадрҙар әҙерләнде, уның һөҙөмтәһендә үҫеш иҡтисады менән шөғөлләнгән “инвестиция спецназы” булдырылды. Конкурс финалын ойошторғанда ғәмәлдәге телевидение жанры һайланды. “Роспотребназор”ҙың пандемия осоронда хәүефһеҙлек ҡағиҙәләрен үтәү тәҡдиме буйынса белгестәрҙе һайлауҙың бындай ысулы Рәсәйҙә беренсе тапҡыр ҡулланыла.

Башҡортостан Республикаһы Башлығы ҡарамағындағы Башҡортостан дәүләт хеҙмәте һәм идара итеү академияһында Башҡортостан стратегик тикшеренеүҙәр үҙәге менән Башҡортостандың ”Офис-төркөм” конгресс-бюроһы командаһы ҡатнашыусыларҙы һайлауҙа кейс-әңгәмә үткәрҙе. Алдағы көндәрҙә телетапшырыу Үҙәктең сайтында https://csr-rb.ru күрһәтеләсәк.

Иң яҡшыларҙы һайлауҙа үҙенсәлекле әңгәмә алымы ҡулланылған: ойоштороусылар ҡатнашыусыларға тиң шарттар тыуҙырған. Шәхси аралашыу бүлмәһендә төрлө яҡлап видеокамералар ҡуйыла, улар конкурсанттар менән аралашыуҙың бөтә этаптарын да теркәп бара. Бер яҡтан көҙгө, ә икенсе яҡтан үтә күренеп торған быяла ҡуйылған күҙәтеү бүлмәһенән Төбәк иҡтисады үҙәге директоры Марат Фәттәхов, Стратегик тикшеренеүҙәр үҙәге директоры Рөстәм Дәүләтов, Башҡортостан Республикаһы Башлығы ҡарамағындағы Башҡортостан дәүләт хеҙмәте һәм идара итеү академияһы ректоры Илгиз Ҡәҙерғолов составындағы комиссия сараны күҙәтә. “Стратегик тикшереүҙәр үҙәге” федераль фонды президенты Владислав Онищенко ла һайлау конкурсына килде.

Ҡатнашыусыларҙы баһалағанда төп талаптар - маҡсатҡа ынтылыусанлыҡ, уйлап таба белеү һәм тиҙ ҡарар ҡабул итеү, үҙенсәлекле булыу. Бынан тыш, конкурсанттарға иҡтисад, социология, менеджмент һәм юриспруденция өлкәһендә көтөлмәгән һорауҙар ҙа бирелде.

Һайлау һөҙөмтәләре буйынса еңеүселәр кадрҙар резервына индерелә, ә иң яҡшылар Башҡортостандың стратегик тикшеренеүҙәр үҙәгенә эшкә саҡырыласаҡ. Был бәйгелә 100-ҙән ашыу кеше ҡатнашырға теләк белдерһә, уларҙың 66-һы финалға сыҡҡан. Унда 32 кеше һайлап алынған, улар Башҡортостандың стратегик тикшеренеүҙәр үҙәге коллективының идара көсөн булдырасаҡ.

Ә инде һайлап алыу конкурсын үтә алмағандар Башҡортостан Республикаһы Башлығы ҡарамағындағы Башҡортостан дәүләт хеҙмәте һәм идара итеү академияһы профессорҙарынан кәңәш-тәҡдимдәр аласаҡ.

Мәғлүм булыуынса, быйыл йәй республика Башлығы Башҡортостостандың стратегик тикшеренеүҙәр үҙәген булдырыу тураһындағы указға ҡул ҡуйғайны.

Фото: БР Конгресс-бюроһынан.