+20 °С
Болотло
Сәйәсәт һәм хоҡуҡ
17 Июнь 2021, 10:45
Был команданың өлөшө булыу - ғорурлыҡ
Ләйсән Хазыроваға 24 кенә йәш. Ә уның башҡарған эштәре...
Беҙ “Хәбиров командаһы” тигән рубриканы дауам итеп, бар күңелен биреп Башҡортостанда эшләгән, төбәк етәксеһе сәйәсәтен яҡлаған һәм республикабыҙҙы иң яҡшы урын тип иҫәпләгән кешеләр тураһында һөйләйбеҙ. Улар шундай уҡ республика кешеләре – табиптар, спортсылар, комбайнсылар, депутаттар, етәкселәр.
Бөгөнгө һүҙебеҙ Белорет ҡыҙы Ләйсән Хазырова тураһында. Уға ни бары 24 йәш. Я. Хамматов исемендәге башҡорт гимназияһын отличие менән тамамлағас, БДМУ-ға уҡырға инә.
Ауыр 2020 йыл уның өсөн дә ҡатмарлы була. Ләйсән медик-ирекмән булып китә, #Беҙбергә акцияһы сиктәрендә ҡыҙыу линияға килгән мөрәжәғәттәрҙе ҡабул итә.
“Мин ошондай ҙур хәрәкәт өлөшө булыуым, яҡшы кешеләр компанияһында тәжрибә уртаҡлаша алыуым, фекерҙәрем, идеяларым тураһында һөйләй алыуым менән бәхетле. Беҙ күберәк һәм көслөрәк булырбыҙ тип ышанам”, – тип яҙғайны Ләйсән медик-ирекмәндәрҙең беренсе форумында ҡатнашҡандан һуң.
Әле Ләйсән Хазырова Башҡортостан Йәмәғәт палатаһы ағзаһы, “Медик-ирекмәндәр” Бөтә Рәсәй йәмәғәт хәрәкәтенең Башҡортостан бүлексәһе етәксеһе, БДМУ-ның алтынсы курс студенты. Уның ирекмәнлек эшмәкәрлеге 2015 йылда, университетҡа уҡырға ингәс башланған һәм әле лә дауам итә.
“БДМУ-ның Ирекмәндәр үҙәге менән берлектә беҙ йыл һайын бик күп акциялар һәм проекттар ойошторҙоҡ. Мәҫлән, “СТОПВИЧСПИД”, “Соль+йод: IQ сбережёт”, “Быуындар һаулығы беҙҙең ҡулдарҙа”, “Балалар өлкәндәр һағында” һәм башҡалар. Нефрология менән берлектә ойошторолған, трансплантация үткән пациенттарға ярҙам йөҙөнән үткәрелгән “Мин үҙемдең бөйөрҙәремде яратам” акцияһы иң ҙурҙарының береһе булды”, – ти Ләйсән Хазырова.
Ләйсән етәкселек иткән “Медик-ирекмәндәр” хәрәкәтенең Башҡортостан бүлексәһе “Медик-ирекмәндәрҙең беренсе республика форумы” ойошторған иҫкәртеү саралары буйынса гранттар отҡан һәм уларҙы тормошҡа ашырған.
2020 йылдың мартында улар #Беҙбергә оператив штабы эшен башлай. Уларҙың колл-үҙәге 65 йәштән өлкәндәр һәм инвалидтарҙан аҙыҡ-түлек йыйылмалары, дарыуҙар һәм бик кәрәкле әйберҙәр килтереүгә ғариза ҡабул итә.
Штаб эшен ойошторған өсөн ул республиканың дәүләт йәштәр сәйәсәтенең почетлы эшсеһе знагы һәм Рәсәй Президентының “#Беҙбергә Дөйөм Рәсәй ярҙам акцияһын ойоштороуға индергән өлөшө өсөн” миҙалы менән наградлана. Шулай уҡ бик күп рәхмәт хаттары, грамоталары һәм сертификаттары бар.
– Быйыл мин университетты тамамлайым һәм тар белгеслек алыу өсөн ординатураға инергә йыйынам. Һәм таныштарҙан ишеткән иң йыш һорау: “Икенсе ҡалаға китәһеңме, әллә өйҙә ҡалаһыңмы”? Яуабым бер: алты йыл элек республикала уҡырға ҡалырға ҡарар иткәнем өсөн бик шатмын һәм әле лә бер ҡайҙа ла китергә йыйынмайым. Үҙ өйөңдә йәшәү һәм эшләү бик мөһим бит. Эшләү генә түгел, үҙемдең йәмғиәткә файҙа килтерә алыуымды аңлау ҙур әһәмиәткә эйә. Инде өс йыл мин Башҡортостандың медик-ирекмәндәре эшен координациялайым. Беҙ бик күп проекттар тормошҡа ашырабыҙ, – ти Ләйсән. – Һуңғы йылдарҙа “Донъяны үҙгәрткең килһә – үҙеңдән башла” тигән һүҙҙәр оҡшай миңә. Ул әлеге ваҡытта минең тормошомдоң девизы. Талантлы, әүҙем, ҡыйыу кешеләр командаһы өлөшө булыу, Хәбиров командаһында эшләү ҙур бәхет.
#командахабирова
