Башҡортостан тәжрибәһе таратыуға лайыҡ

Кайрат Абдрахманов Рәсәйгә рәсми вәкил булараҡ сәфәргә тәүге тапҡыр килгән.

– Күп милләтле йәмғиәттәрҙең үҫеш тәжрибәһен урындарға барып өйрәнергә ҡарар иттек. Башҡортостан Рәсәйҙә беҙ ошо мөһим маҡсат менән йүнәлгән беренсе төбәк булды, – тине ул.

Башҡортостан Башлығы иһә республикабыҙҙың быуаттар дауамында төрлө халыҡтарҙың мәҙәни аралашыу урыны тип һаналыуын билдәләне.

– Беҙҙә 160 самаһы милләт вәкиле булған 4 миллиондан ашыу кеше йәшәй. Халыҡ араһында ҡатнаш никахтар күп. XVIII быуаттан бирле Өфө – Рәсәйҙә Ислам диненең үҙәге. Шул уҡ ваҡытта төбәктә православие митрополияһы ҙур ғына, Европалағы иң эре йәһүд мәҙәни үҙәге лә Өфөлә, – тине Радий Хәбиров. – Мәктәптәребеҙҙә 15 туған тел уҡытыла, милли йәкшәмбе мәктәптәре лә – 15. Өҫтәүенә заманса күп профилле полилингваль мәктәптәр асабыҙ, улар әле 4 булһа, 2024 йылғаса тағы 11-ҙе ойошторорға ниәт ҡорғанбыҙ. Ғөмүмән, минеңсә, 3 – 10 июлдә Бөтә донъя фольклориадаһының Башҡортостанда уҙғарылыуы маҡсатҡа ярашлы.

Кайрат Абдрахманов республика етәксеһенә йылы ҡабул иткәне өсөн рәхмәт белдерҙе һәм Рәсәйҙе ОБСЕ-ның мөһим партнеры тип атаны. Уның фекеренсә, Башҡортостанда тел сәйәсәтен тормошҡа ашырыу, мәктәптәрҙә уҡытыуҙы ойоштороу, сит ил кешеләрен йәмғиәткә яраҡлаштырыу йәһәтенән яҡшы өлгөләр күренә, уларҙы ОБСЕ-ның барлыҡ биләмәһенә таратырға кәрәк.

Юғары комиссар шулай уҡ төбәк етәкселегенең коронавирустың таралыуына ҡаршы тороу, һаулыҡ һаҡлау системаһына ярҙам итеү, социаль-иҡтисади үҫеште тиҙләтеү буйынса ҙур тырышлыҡ һалыуын баһаланы.

Фото: glavarb.ru