Законһыҙ ғәмәлдәргә кәртә ҡуйылды

Ваҡытында түләнмәгән бурысты кире ҡайтарғанда закон һәм заемсы хоҡуғын боҙоуға юл ҡуйған микрокредит компанияһы суд приставтары хеҙмәтенең тикшереүе һөҙөмтәһендә административ яуаплылыҡҡа тарттырылды. 

Федераль суд приставтары хеҙмәтенең Башҡортостан идара­лығына Әбйәлил районында йәшәгән ҡатын мөрәжәғәт иткән. Ул заем килешеүе төҙөгән “Макро” микрокредит компанияһының законһыҙ ғәмәлдәренә зарланған. 

Административ тикшереү барышында суд приставтары ойошма­ның 230-сы Федераль законды боҙоуын асыҡлаған. Мәскәүҙәге микрокредит компанияһы ҡатынға аҙнаһына бер тапҡырҙан күберәк шылтыратҡан. Шулай уҡ һөйләшеү барышында уға психологик баҫым яһаған. Өҫтәүенә, бурысын түләмә­гән осраҡта уның туғандары, хатта күршеләре менән эш итәсәктәре тураһында белдергән­дәр. 

Закон боҙоу осраҡтарын иҫәпкә алып, Федераль суд приставтары хеҙмәтенең Башҡортостан идара­лы­ғы “Макро” йәмғиә­тенә ҡарата Рәсәй Административ хоҡуҡ боҙоуҙар тураһындағы кодексының “Ваҡытында түләнмәгән бурысты ҡайтарыу буйынса эшмәкәрлекте тормошҡа ашыр­ғанда физик берәмектәрҙең хоҡуҡтарын һәм законлы мәнфәғәттәрен яҡлау тураһындағы закон талаптарын боҙоу” хаҡындағы 14-се статьяһы 1-се пунктына ярашлы административ эш ҡуҙғатҡан. Суд ойошманы тәртип боҙоуҙа ғәйепле тип таный һәм 20 мең һум күләмендә штраф һалған. 

Әйткәндәй, 230-сы Федераль законға ярашлы, кредитор йәки ваҡытында түлән­мәгән бурысты кире ҡайтарыу буйынса эшмәкәр­лекте тормошҡа ашырған кеше бурыслыға тәүлегенә иң күбе бер тапҡыр, аҙнаһына ике тапҡыр шылтыра­тырға, эш көнөндә иртәнге сәғәт 8-ҙән киске 10-ға тиклем, ял һәм байрам көндәрендә  иртәнге сәғәт 9-ҙан киске 8-гә тиклем һигеҙ тапҡыр осрашырға хоҡуҡлы. Шул уҡ ваҡыт­та ул бурыслы кешегә психологик баҫым яһарға, физик көс ҡулланып, сәләмәт­легенә зыян килтереп йә иһә башҡа ғәмәлдәр менән уны, туғандарын йәки таныштарын ҡурҡытырға тейеш түгел.

Лилиә ДӘҮЛӘТБӘКОВА әҙерләне.