Ысын батырҙарҙан өлгө алайыҡ

25 октябрҙә Рәсәй Президентының Волга буйы федераль округындағы тулы хоҡуҡлы вәкиле Игорь Комаров, Башҡортостан Хөкүмәте Премьер-министры Андрей Назаров һәм Волга буйы федераль округының Закондар йыйылышы вәкилдәре генерал-майор Миңлеғәле Шайморатов һәйкәленә сәскә һалыу тантанаһында ҡатнашты.

– Һәйкәл һоҡландыра һәм илһамландыра. Ул ҡаланы биҙәп кенә ҡалмаҫ, ә балаларҙа, йәштәрҙә тарихҡа, республика мираҫына иғтибар уятыр, үҫеп килгән быуын бөтә ил һоҡланған ысын батырҙарҙан өлгө алыр, тип ышанам, – тине Игорь Комаров.

Рәсәй Геройы, 112-се Башҡорт кавалерия дивизияһы командиры, генерал-майор Миңлеғәле Шайморатовҡа һәйкәл Башҡортостан Башлығы Радий Хәбиров тәҡдиме буйынса ҡуйылды. Ул 11 октябрҙә – Республика көнөндә тантаналы рәүештә асылды.

Легендар командирға һәйкәл конкурс нигеҙендә һайлап алынды, уны  билдәле скульптор Салауат Щербаков эшләне. Постаменттың ситтәренән барельефтар ҡуйылған. Унда башҡорт халҡының ҡаһарман үткәне сағыла – “Урал батыр” эпосы, халыҡ батыры Салауат Юлаев, “төньяҡ амурҙары” һәм 112-се Башҡорт кавалерия дивизияһы.    

Фото һәм мәғлүмәт сығанағы: Игорь Комаров и Андрей Назаров возложили цветы к памятнику генерал-майору Минигали Шаймуратову в Уфе (pravitelstvorb.ru)