Ноябрҙә ниндәй закондар ғәмәлгә инә?

Рәсәй Юристар ассоциацияһының Башҡортостан бүлексәһе быйыл ноябрҙә үҙ көсөнә ингән закондарға аңлатма бирҙе.

1 ноябрҙән, РФ Хөкүмәте Ҡара­рына ярашлы, асыҡ программа тәь­минәтен ҡулланыуға хоҡуҡ биреү буйынса эксперимент башланды. Был сарала үҙ иркең менән ҡатнашырға мөмкин. Ғаризаны 2023 йылдың 1 апреленә тиклем яҙырға мөмкин. Программа 2024 йылдың 30 апреленә тиклем ғәмәлдә ҡала.

Асыҡ программа тәьминәтенән файҙаланырға рөхсәт биреү – уны ҡарау өсөн асыҡ кодлы программа  ул. Уның яңы версиялары әҙер кодты ҡулланыу мөмкинлеген бирә.

Камчатканан ҡыҙыл ыуылды­рыҡты ситкә сығарыуҙы сикләйә­сәктәр. Бер кеше самолетҡа 10 килограмдан ашмаған деликатесты индереү мөмкинлегенә эйә була. Был сикләү – 2025 йылдың авгусына тиклем. Евразия иҡтисади сою­зы маркаһы, йәғни сәнәғәттә етештерелмәгән ыуылдырыҡ ха­ҡын­да һүҙ бара. Сара ярым­утрау­ҙан законһыҙ рәүештә алынған ыуыл­дырыҡты сығарыуҙы сик­ләйәсәк.

2 ноябрҙән Евразия иҡтисади союзында электрон сигарет менән электр быуландырғыстарға марка ҡуйылды. Был союзға ҡараған дәү­ләттәр тамғалау ваҡытын үҙҙәре билдәләй һәм, алты айҙан да һуңға ҡалмайынса, был хаҡта иҫкәртергә тейеш.

Стадиондарға турникеттар, контроль-тикшереү пункты һәм мотор­лаштырылған бәләкәй ҡапҡалар (калитка) ҡуйыла. Компьютер иһә тамашасының йәки ярыштарҙа ҡатнашыусыларҙың Fan ID паспортын уҡыясаҡ.

7 ноябрҙән таможня хеҙмәткәр­ҙәре автомобиль транспорты хәрә­кәтенә блокировка һала ала. Йөк машиналарын туҡтатҡанда вазифалы кеше үҙе менән танышты­рырға, ә водитель талап итһә, хеҙмәт таныт­маһын күрһәтергә тейеш. Ошонан һуң таможня хеҙмәт­кәре видео­регистраторҙың файҙа­ланылыуы, транспорттың туҡта­тылыу сәбәп­тәре тураһында иҫкәртергә, йөк машинаһы ташыған тауарҙарға до­кументтарҙы һорарға бурыслы. Әгәр водитель мобиль төркөмдән ҡасырға тырышһа, был транспорт сараһының артабан хәрәкәт итеүен блокировкалаясаҡ махсус сараны файҙаланыу рөхсәт ителә.

10 ноябрҙән инвесторҙар ҡим­мәтле ҡағыҙҙарҙы Рәсәй акцияларына мәжбүри конверта­циялауға ғариза яҙа ала. Бынан тыш, Рәсәй­ҙең ҡиммәтле ҡағыҙ­ҙарын сит ил депозиторийынан Рәсәйҙекенә мәжбүри тәртиптә күсерергә теләү­селәр ҙә ошондай хоҡуҡҡа эйә буласаҡ.

12 ноябрҙән ҙур компаниялар дәүләт ҡатнашлығында подрядсылар – бәләкәй һәм урта эш­ҡы­уарлыҡ субъекттарының үҫеш программаларын тормошҡа ашыра ала. Был программаларға финанс, хоҡуҡи, методик, мәғлүмәт һәм башҡа ярҙам сараларын күрһәтеү буйынса саралар индереү мөмкинлегенә эйә буласаҡ.

23 ноябрҙән банктар Федераль һалым хеҙмәте ярҙамында кредит каникулына хоҡуғын тикшертә ала. Мобилизацияланғандар һәм махсус хәрби операцияла ҡатнашыусылар өсөн кредит каникулын биреү хоҡуғын раҫлау тәртибе ябайлаштырылды. Кредиторҙар был мәғлү­мәтте Федераль һалым хеҙмәтенән һораттыра ала. Ә ул үҙ сиратында был мәғлүмәттәрҙе Рәсәй Оборона министрлығынан аласаҡ.

30 ноябрҙән офицерҙарға наградалар кортиктарын һаҡлау ҡа­ғиҙәләре ябайлаштырыла. Форманы кейеү хоҡуғы менән хәрби хеҙ­мәттән ҡайтарылған хәрбиҙәр кор­тиктарҙы Росгвардияла теркәт­мә­йенсә һәм уларҙы һаҡлауға, ҡорал йөрөтөүгә рөхсәт алмайынса йөрө­тә ала. Бындай ҡоралды мираҫ бу­йынса алған граждандар теркәтергә тейеш.

Айһылыу НИЗАМОВА