Рәсәй Конституцияһы үҙәгендә – кеше

Бөгөн – Рәсәй Федерацияһы Конституцияһы көнө. Ошо айҡанлы Башҡортостан Хөкүмәте Премьер-министры Андрей Назаров фекере менән уртаҡлашты.

"Бөгөн беҙ иң мөһим дәүләт байрамдарының береһен — Рәсәй Федерацияһының Конституция көнөн билдәләйбеҙ. Илдең был төп хоҡуҡи документы — дәүләтселектең ныҡлы нигеҙе, уның төҙөлгәненә 29 йыл.

Ғүмеремдең күп йылдарын юриспруденцияға арнаным һәм был байрамға айырыуса хөрмәт менән ҡарайым.

Рәсәй Конституцияһы, бәлки, бөтәһенән дә айырмалы рәүештә, Ватан именлеге хаҡына беҙҙәге барлыҡ көстәрҙе берләштерә ала. Ул тере, үҫештә булған документ, хоҡуҡ системаһының нигеҙе һәм традицияларҙың, рухи-әхлаҡи идеалдарҙың сағылышы булып тора.

Быйыл тыуған рус ерҙәренең илгә ҡайтыуын төҙәтеп, уға үҙгәрештәр индерелде.

Тәүге конституция проекттары төҙөлөүгә ике быуат үтте. Бөгөн тәбиғи нәмә тип ҡабул ителгән документ элекке быуын кешеләре өсөн төш, маҡсат һәм ынтылыш мәғәнәһе булған.

Бөгөн Конституция бығаса күрелмәгән тышҡы сәйәсәт, санкциялар баҫымы шарттарында илдең нығыныуында төп роль уйнай, Рәсәй ҡануниәтенең халыҡ-ара хоҡуҡтан өҫтөнлөгөн билдәләй, йәмғиәтебеҙҙе сит идеологияларҙың үтеп инеүенән, ҡыйратҡыс көстәрҙән һаҡлай.

Рәсәй Федерацияһы Конституцияһы үҙәгендә – кеше. Төп Закон бөтә граждандарҙың тормош уңышына нигеҙ һала – бушлай белем алыу, ижади үҫеш, ирекле хеҙмәт һәм шәхси милектең тейелгеһеҙлеге өсөн шарттар тыуҙыра, пенсионерҙарға, күп балалы ғаиләләргә, мөмкинлектәре сикләнгәндәргә социаль гарантиялар бирә. Ошо һәм башҡа бик күп статьялар төп байлыҡ – илдең милли хазинаһы булған кеше потенциалын яҡлауға, асыуға йүнәлтелгән.

Хөрмәтле яҡташтар, байрам менән! Бер-беребеҙҙе, тыуған еребеҙҙе, бөйөк Ватаныбыҙҙы һаҡлайыҡ! Һәммәгеҙгә лә бәхет һәм муллыҡ!" – тип яҙған Андрей Назаров.

Фото: vk.com /wall555400080_2161.