Белоруссия менән хеҙмәттәшлекте нығытыуға аҙымдар яһалды

15 июндә Петербург халыҡ-ара иҡтисади форумы майҙансығында Башҡортостан Башлығы Радий Хәбиров Беларусь Премьер-министрының беренсе урынбаҫары Николай Снопков менән осрашты. Көн тәртибендә-халыҡ-ара хеҙмәттәшлекте нығытыу, шул иҫәптән иҡтисади һәм социаль өлкәлә берлектәге проекттарҙы тормошҡа ашырыу.

– Беҙ Рәсәй һәм Белоруссия төбәктәренең X Форумы алдынан осрашабыҙ. Ул үҙ-ара мөнәсәбәттәрҙе үҫтереүгә яңы этәргес бирер, тип ышанам, - тине Радий Хәбиров. – Һуңғы ике йылда тауар әйләнешен арттырҙыҡ, туристик һәм мәҙәни бәйләнештәр төҙөнөк. Шуға бәйле Өфөнән Минскиға икенсе авиарейсты ебәреү ихтыяжы бар.

Төбәк етәксеһе берлектәге эштең төп йүнәлештәрен билдәләне.

- Беҙ «Амкодор» машиналар эшләү холдингы менән яңы күләмле проекттар менән ғорурланабыҙ. Тиҙҙән Башҡортостанда ауыл хужалығы ҡорамалдары етештереү буйынса беренсе заводты асасаҡбыҙ. Еңел сәнәғәт өлкәһендә хеҙмәттәшлек итеү буйынса пландар бар. Быйыл башлап ебәрелгән «Башҡорт – Беларусь оҙон ғүмерлелеге» программаһы ла үҙ-ара эш итеүҙең тағы бер йүнәлеше булып тора. Ҡыҫҡа ғына ваҡыт эсендә ул төбәк халҡы өсөн үҙенең әһәмиәтен иҫбатланы, – тип билдәләне Радий Хәбиров. – Дөйөм алғанда, беҙҙең бурыс - төрлө тармаҡтарҙа һәм өлкәләрҙә тәрән интеграцияға өлгәшеү.

Белоруссия Премьер-министрының беренсе урынбаҫары Николай Снопков берлектәге проекттарҙың стратегик әһәмиәтен һыҙыҡ өҫтөнә алды.

- Беларусь менән хеҙмәттәшлекте нығытыуҙа әүҙем позицияһы һәм реаль аҙымдары өсөн Башҡортостандың идара итеү командаһына рәхмәт белдерәм. Был форумда һеҙ ойошторған матур стенд та төбәктең күркәмлеген күрһәтә, - тине ул. - Хәҙерге шарттарҙа берлектәге бизнесты үҫтереү Рәсәй-Белоруссия мөнәсәбәттәренең киләсәк үҫешенең нигеҙе. Һәм, әлбиттә, Башҡортостан – Рәсәйҙең ысын тәбиғи ынйыһы, туристик инфраструктураһы һәм шифаханалар селтәре үҫешкән төбәк.

Николай Снопков шулай уҡ Өфөнән Минскиға икенсе авиарейсты башлау менән ҡыҙыҡһыныуын белдерҙе.

Сығанаҡ: glavarb.ru