15 апрелдә республика Хөкүмәтендә үткән оператив кәңәшмәнән иң мөһим яңылыҡтарҙы, ҡарарҙарҙы тәҡдим итәбеҙ.
- Башҡортостан Башлығы бойороғо менән Азат Бадранов Башҡортостан Башлығы Хакимиәте етәксеһенең эске сәйәсәт буйынса беренсе урынбаҫары итеп тәғәйенләнде.
- Быға тиклем ошо вазифаны биләгән Урал Килсенбаев Башҡортостан Хөкүмәте Премьер-министрының беренсе урынбаҫары итеп ҡуйылды.
- Йәнә бер кадр үҙгәреше – Элина Ғатауллина Башҡортостан Йәмәғәт палатаһы аппараты етәксеһе итеп тәғәйенләнде.
- 27 апрелдән Башҡортостанда янғынға ҡаршы махсус режим индерелә. Урман янғындары миҙгеле эҫе йәй арҡаһында хәүефле булыр тип көтөлә.
- Республикала ҡала һәм ауылдарҙы таҙалау дауам итә. Радий Хәбиров был эш менән ҡәнәғәт булмауын белдерҙе. Тик 14 ҡала ғына сифатлы йыйыштырған, биш ҡала - уртаса, ҡалғандарҙың кимәле түбән.
- Киләһе өмәләр 20 һәм 27 апрелдә үтә. Өфөлә “Өфө – Аэропорт” юлын һәм Салауат Юлаев проспектын ныҡлы таҙартырға ҡушылды, был урындар баш ҡаланың йөҙө тип аталды.
- “Өфө” аэропорты янында ете ҡатлы ҡунаҡхана төҙөлә. Ул 150 бүлмәнән торасаҡ. Яңы отель 2025 йылдың мартында файҙаланыуға тапшырыласаҡ.
- Башҡортостан ташҡындан зыян күргән Ырымбур өлкәһенә ярҙам күрһәтеүҙе дауам итә. Беҙҙә хәл контролдә тотола. Икенсе аҙнала ташҡын юғары кимәлгә етер тип көтөлә.
- Өфөлә “Әр-Рәхим” мәсете төҙөлөшө дауам итәсәк. Радий Хәбиров эште “штаб” режимында дауам итергә ҡушты, бында башҡараһы бурыстар бик күп. Быйылға нимә эшләнере билдәләнгән.
- Республикаға Белгород өлкәһенән 498 бала килде. Улар Илеш һәм Әбйәлил райондарындағы ике лагерҙа йәшәйәсәк. Радий Хәбиров уларға уңайлы шарттар булдырырға, уҡытыу процесын өҙмәҫкә ҡушты.
- “Йәшел Башҡортостан” акцияһында 99 меңдән ашыу кешенең ҡатнашыуы көтөлә. Сара барышында һигеҙ мең самаһы ҙур ағас һәм 82 мең башҡа үҫенте ултыртыласаҡ. 72 яңы тематик аллея булдырыла.
- 20 апрелдә Башҡортостанда “Хәтер баҡсаһы” акцияһы башлана. 140 гектар майҙанда 500 мең төп яңы ағас ултыртыласаҡ. Башҡортостанда ағас ултыртыуҙың үҙәк майҙаны - “Патриот” паркы, унда 300 йүкә ултыртырға планлаштыралар.
Фото: "Башинформ".