Радий Хәбиров Сергей Лавров менән осрашты

17 апрелдә Мәскәүҙә Башҡортостандың иҡтисади, инвестиция һәм туристик ҡеүәте менән таныштырыу сараһында Рәсәйҙең сит ил эштәре министры, илдең ишеү слаломы федерацияһының Попечителлек советы рәйесе Сергей Лавров менән республика Башлығы Радий Хәбировтың осрашыуы булды.

Осрашыу башында Башҡортостан Башлығы министрға дипломатик хеҙмәткәрҙәрҙең һәм төрлө кимәлдәге эксперттарҙың киң аудиторияһы өсөн Башҡортостан мөмкинлектәрен күрһәтеү өсөн рәхмәт әйтте. Шул иҫәптән сит илдәрҙән дә.

– Был республикабыҙ үҫеше өсөн мөһим аҙым. Беҙ әүҙем тышҡы иҡтисади эшмәкәрлек алып барабыҙ һәм һуңғы йылдарҙа Рәсәйҙең Сит ил эштәре министрлығы булышлығында беҙҙең күп кенә сауҙа вәкиллектәрен сит илдәрҙә асҡанбыҙ, – тип билдәләне Радий Хәбиров. – Мәҙәни һәм гуманитар бәйләнештәр ҙә әүҙем киңәйә. Айырыуса беҙҙең төп партнерҙарыбыҙ – Беларусь һәм Ҡаҙағстан менән тығыҙ эш алып барабыҙ. Ә Абхазия менән хеҙмәттәшлек сиктәрендә быйыл Өфөлә башҡорт һәм Абхазия халыҡтары дуҫлығын символлаштырасаҡ колоннада асырға планлаштырабыҙ.

Рәсәй Сит ил эштәре министрлығы башлығы билдәләүенсә, идара итеү командаһының тырышлығы менән республика Рәсәйҙә иҡтисадты, шулай уҡ мәҙәни һәм спорт өлкәһен үҫтереү буйынса алдынғылыҡты һаҡлап ҡала.

– Башҡортостан был йәһәттән – илебеҙ йөҙө. Әүҙем тышҡы иҡтисади эшмәкәрлек өсөн рәхмәт әйткем килә. Бынан тыш, төбәктә спорттың яҡшы темптар менән үҫешеүен беләм. Атап әйткәндә, Өфөлә ишкәкле слалом комплексы – донъя кимәлендәге заманса ҡоролма төҙөлә, – тине Сергей Лавров. – Республика вәкиле Алһыу Миназова – слалом буйынса иң яҡшы спортсыларыбыҙҙың береһе. Башҡортостан атлеттарына уңышлы сығыштар, яңы сағыу еңеүҙәр теләйем.

Республика Башлығы Радий Хәбиров Сергей Лавровты 2024 йылдың йәйендә һәм көҙөндә Өфөнөң 450 йыллығына арналған сараларҙа ҡатнашырға саҡырҙы.

Рәсәйҙең сит ил эштәре министры Сергей Лавров һәм Башҡортостан Башлығы Радий Хәбиров Башҡортостан экспозицияһын ҡарап сыҡты. Ул Рәсәй Сит ил эштәре министрлығы ҡарамағындағы Дипломатик корпусты хеҙмәтләндереү буйынса баш етештереү-коммерция идаралығының мәҙәни үҙәге майҙанында йәйелдерелде.

Бында төбәктең социаль-иҡтисади үҫеш өлкәһендәге ҡаҙаныштары, үҙенсәлекле тәбиғи матурлығы һәм үҙенсәлекле мәҙәниәте менән таныштырҙылар.

Сергей Лавров менән Радий Хәбиров экспозицияны ҡараны һәм иң тәүҙә күскенселәр тирмәһен ҡараны, ҡунаҡтарҙы республика халыҡтарының көнкүреше һәм милли аш-һыуы менән таныштырҙы. Рәсәйҙең сит ил эштәре министрына башҡорт ихатаһында солоҡ балын нисек алыуҙарын күрһәттеләр. Радий Хәбиров әйтеүенсә, боронғо технология Башҡортостанда ғына һаҡланып ҡалған.

– Бөрйән солоҡ ҡортон һаҡлау өсөн түмәр-солоҡ умартасылығына ярҙам программаһын ҡабул иттек һәм Бөрйән районында махсус заказник булдырҙыҡ, – тине Радий Хәбиров.

Экспозицияла төп урындарҙың береһен легендар хәрби начальник, Рәсәй Геройы, генерал-майор Миңлеғәле Шайморатов һәйкәленең күләмле күсермәһе биләй. Төбәк башлығы Сергей Лавровҡа һәйкәлдең Өфөнөң Совет майҙанында Ватанды һаҡлап һәләк булған яугирҙәр иҫтәлегенә ҡуйылыуы хаҡында һөйләне.

Экспозицияны ҡарау сиктәрендә ишкәкле слалом буйынса Рәсәй чемпионы, донъя чемпионаттарының бронза призёры Алһыу Миназова видеобәйләнеш аша Рәсәйҙең сит ил эштәре министрына спорттың был төрөнә ярҙам иткәне өсөн рәхмәт белдерҙе. Алһыу Миназова шулай уҡ Сергей Лавровты 2024 йылдың көҙөндә үтәсәк “Рәсәй - спорт державаһы” халыҡ-ара форумында ҡатнашыу өсөн Өфөгә саҡырҙы. Башҡортостандың спорт министры Руслан Хәбибов спортсының һорауы буйынса Рәсәй Сит ил эштәре министрлығы башлығына “Донъя мәсьәләләрен хәл итеү өсөн” тигән яҙыулы ишкәк тапшырҙы. Уның менән слаломсы 2021 йылда Токиола Олимпия уйындарында ҡатнашты.

Сергей Лавров менән Радий Хәбиров “Янғантау” геопаркын һәм Шүлгәнташ мәмерйәһен үҫтереүгә арналған стендтарҙы ҡараны.

Фото: Башҡортостан Башлығы сайты.