2 сентябрь - “Мобиль һайлаусы” программаһы буйынса ғариза ҡабул итеүҙең һуңғы көнө

6, 7 йәки 8 сентябрҙә теркәлеү урыны буйынса йәшәмәгән, әммә Башҡортостан Республикаһы сиктәрендә ҡалған граждандар “Мобиль һайлаусы” механизмын файҙалана ала.

Бының өсөн граждан ваҡытлыса йәшәйәсәк урыны буйынса һайлаусылар исемлегенә индереү тураһында ғариза бирергә тейеш. Уны өс юл менән башҡарырға мөмкин:

- 22 июлдән 2 сентябргә тиклем – Башҡортостан Республикаһы биләмәһендәге үҙегеҙ теләгән территориаль һайлау комиссияһына йәки Күп функциялы дәүләт һәм муниципаль хеҙмәттәр күрһәтеү үҙәгенә шәхсән мөрәжәғәт итергә;

- 28 августан 2 сентябргә тиклем – республиканың үҙегеҙ теләгән участка һайлау комиссияһына – шәхсән барырға;

- 22 июлдән 2 сентябрҙең 24:00 сәғәтенә тиклем (Мәскәү ваҡыты) “Дәүләт хеҙмәттәре” порталында электрон рәүештә ғариза ебәрергә.

Ғариза биргәндә Рәсәй Федерацияһы гражданының паспортын күрһәтергә кәрәк (паспортты алмаштырыу осоронда – фотоһүрәте булған ваҡытлыса шәхес танытмаһы).

Урындағы үҙидараның вәкәләтле органдарына  – ауыл һәм ҡасаба Советтарына, муниципаль район һәм ҡала округтары Советтарына төп һәм өҫтәмә һайлауҙа “Мобиль һайлаусы” механизмы ҡулланылмай.

Граждандарға ярҙам итеү өсөн Башҡортостан Республикаһы Үҙәк һайлау комиссияһы сайтының “Уңайлы булған ерҙә тауыш бир” (“Голосуй, где удобно”) бүлегендә һаулыҡ мөмкинлектәре сикләнгән кешеләр өсөн яраҡлаштырылған һайлау участкалары тураһында мәғлүмәт урынлаштырылған. Мәғлүмәт инвалид һайлаусылар өсөн генә түгел, өлкән йәштәгеләр, башҡа аҙ хәрәкәтсән граждандар өсөн дә файҙалы була ала.

Унда һайлау участкаһының номерын, уның адресын, тауыш биреү бүлмәһенең ниндәй ҡатта урынлашыуын, шулай уҡ пандустар, ваҡытлыса һалынған юлдар, персоналды саҡырыу төймәһе, лифттар булыуы тураһында мәғлүмәт алырға мөмкин.

Тулы мәғлүмәт алыу өсөн һылтанма: http://bashkortostan.izbirkom.ru/v2024/?CID=1322

Фото: vk.com/clubbashkortostanizbirkom