Киләсәктә иғтибарҙы һәр кешенең яҙмышына йүнәлтеү мөһим

8 сентябрҙә Өфөлә Башҡортостан Башлығы Радий Хәбиров Йәмәғәт ярҙамы штабында булды. Төбәк етәксеһе ойошманың әүҙемселәренә һайлау кампанияһы осоронда эшләгәндәре өсөн рәхмәт белдерҙе. 6-8 сентябрҙә Башҡортостанда республика Башлығын, шулай уҡ райондарҙа урындағы совет депутаттарын һәм 54-се Өфө бер мандатлы округы буйынса төбәктең Дәүләт Йыйылышы - Ҡоролтай депутатын һайлау уҙҙы.

– Республикала һайлауҙар ойошҡанлы үтте, һайлауға килеү күрһәткесе 70 проценттан ашыу тәшкил итте. Тауыштарҙы иҫәпләү бара, тиҙҙән тауыш биреү һөҙөмтәләре иғлан ителә ", – тине республика етәксеһе Радий Хәбиров. – Ошо ҡатмарлы осорҙа тыуған республикаһына ышанған һәм уға ярҙам иткән өсөн Башҡортостан халҡына рәхмәт әйтергә тейешбеҙ.

Уҙған биш йылда Башҡортостандың идара итеү командаһы ил һәм республика мәнфәғәтендә һөҙөмтәле эшләне, тип билдәләне төбәк Башлығы.

– Бергәләп ҙур юл, етди һынауҙарҙы үттек. Беҙҙең идеяларҙы күтәреп сыҡҡанығыҙ һәм республика нисек үҫешергә тейешлеген аңлағанығыҙ өсөн ысын күңелдән рәхмәт, – тине Радий Хәбиров. – Эшебеҙ халыҡ тормошон яҡшыртыуға йүнәлтелде. Башҡортостан илебеҙҙең терәк төбәге булып ҡалһын өсөн. Барыһы ла килеп сыҡты һәм башҡарылған эш менән ғорурлана алабыҙ, тип иҫәпләйем.

Йәмәғәт ярҙамы штабы активистары менән аралашыу барышында Башҡортостан Башлығы республиканың артабанғы үҫеш өҫтөнлөктәре хаҡында ла һөйләне.

– Киләһе биш йыллыҡ республиканың идара итеү командаһы өсөн еңел булмаясаҡ. Был махсус хәрби операцияға булышлыҡ итеү һәм ябай булмаған макроиҡтисади шарттарға ла бәйле. Бынан тыш, халыҡ власҡа, алып барылған социаль сәйәсәткә етди талаптар ҡуя, – тине төбәк етәксеһе Радий Хәбиров. – Федераль үҙәк менән үҙ-ара эш итеүҙе яйға һалдыҡ, ҙур проекттар сиктәрендә эшләргә өйрәндек, Башҡортостан Хөкүмәтенең һөҙөмтәле структураһын төҙөнөк. Шул уҡ ваҡытта киләсәктә иғтибарҙы һәр кешенең яҙмышына йүнәлтеү мөһим. Бының өсөн бөтә кимәлдәрҙә лә бик системалы эш талап ителә. Көсөбөҙҙө берләштереп кенә алға китә алабыҙ.

Фото: Башҡортостан Башлығы сайты.