Радий Хәбиров Владимир Якушев менән осрашты

Республика етәксеһе Башҡортостан бүлексәһе эшмәкәрлегенең төп йүнәлештәре һәм киләсәккә уй-ниәттәре хаҡында һөйләне. Эштең өҫтөнлөклө йүнәлештәренең береһе – махсус хәрби операцияла ҡатнашыусыларға һәм уларҙың ғаилә ағзаларына ярҙам итеү. Ярҙам күрһәтеүгә «Берҙәм Рәсәй»ҙең 2 меңгә яҡын ирекмәне йәлеп ителгән.

Яугирҙәрҙең һәм уларҙың туғандарының мөрәжәғәттәре Миңлеғәле Шайморатов исемендәге ирекмәндәр штабының «ҡыҙыу бәйләнеш»е буйынса ҡабул ителә, телефон һандары: 8 (800) 201-89-03. 2024 йылдың ғинуарынан сентябренәсә штаб белгестәре 1 меңдән ашыу мөрәжәғәтте эшкәрткән. Һүҙ махсус хәрби операция биләмәһендәге хәрби хеҙмәткәрҙәргә гуманитар ярҙам күрһәтеү, льготалар һәм социаль түләүҙәр юллау буйынса консультациялар уҙғарыу, көнкүреш мәсьәләләрен хәл итеү хаҡында бара.

Махсус хәрби операция ветерандары республиканың ижтимағи-сәйәси тормошонда әүҙем ҡатнаша, тип билдәләне Башҡортостан Башлығы. Әйтәйек, 2024 йылдың сентябрендә урындағы үҙидаралыҡ органдарына һайлау йомғаҡтары буйынса 35 хәрби мандат алды. Был хаҡта Рәсәй Президенты Владимир Путин менән осрашыуҙа әйтелгәйне.

Радий Хәбиров Владимир Якушевты партияның төбәк бүлексәһе конференцияһына саҡырҙы, ул 16 ноябрҙә Өфөлә үтәсәк. Тап шул көндәрҙә баш ҡалала «Рәсәй самбо өсөн» («Россия Za самбо») партия проекты сиктәрендә Бөтә Рәсәй форумы һәм спорт турниры уҙғарыла.

Журналистар менән аралашҡанда Радий Хәбиров осрашыуҙың төп йомғаҡтары хаҡында һөйләне:

– «Берҙәм Рәсәй»ҙең Башҡортостан бүлексәһе эшен тикшерҙеләр. Дөйөм алғанда, эшмәкәрлектең бөтә күрһәткестәре буйынса, мәҫәлән, «Берҙәм Рәсәй» яҡлылар һаны буйынса үҫеш билдәләнә. Беҙ 2024 йылдың 16 ноябрендә Башҡортостанда партияның беренсел ойошмалары конференцияһын үткәрергә тәҡдим иттек. Бынан тыш, был көндө Рәсәйҙә Самбо көнөн билдәләйәсәктәр. Шуға күрә республикала ҙур турнир ойошторорға йыйынабыҙ. Осрашыуҙа шулай уҡ партия активистарының социаль селтәрҙәрҙә халыҡ менән диалогын үҫтереү тураһында һөйләшеп килештеләр. Был эшкә етди иғтибар бүләсәкбеҙ.