Иҫәнғолда мировой суд бинаһы ремонттан һуң асылды

Ейәнсура районының Иҫәнғол ауылында ремонттан һуң мировой суд участкаһы бинаһы асылды.

Бинаны асыу тантанаһында Башҡортостандың Юстиция эштәре буйынса дәүләт комитеты рәйесе вазифаһын башҡарыусы Владимир Спеле, Башҡортостан Республикаһы Юғары Суды рәйесе урынбаҫары Азат Ғиззәтуллин, Ейәнсура районы хакимиәте башлығы Дамин Юланов ҡатнашты.

Иҫәнғол ауылының Совет урамындағы дүрт ҡатлы йорттоң өсөнсө ҡатындағы биналар капиталь ремонт үткәреүгә күптән мохтаж була. 2022 йылдан республика Башлығы Радий Хәбировтың булышлығында республика Хөкүмәте мировой судьялар ултырған биналарға ҡуйылған стандарттарға яраҡлаштырыу буйынса биш йылға иҫәпләнгән эш башланы. Был маҡсатта йыл һайын 50 миллион һум аҡса бүленә.

Ремонт эштәре 4 миллион 968 мең һум тәшкил иткән. Был аҡсаға эш кабинеттары тулыһынса ремонтланған, тәҙрәләр алмаштырылған, кондиционер ҡуйылған, һыу менән тәьмин итеү системаһы ремонтланған һәм сантехник приборҙар ҡуйылған, броня быяланан торған кабина монтажлана, видеокүҙәтеү системаһы, полицияны ашығыс саҡырыу төймәләре ҡуйыла, архив бинаһы стационар металл стеллаждар менән йыһазландырыла.

– Яңыртылған бина хеҙмәткәрҙәрҙең эше, килеүселәрҙе ҡабул итеү өсөн уңайлылыҡ кимәле, шулай уҡ документтарҙың йөкмәткеһе буйынса тейешле нормативтарға тап килә, – тип билдәләне Владимир Спеле.

Сарала ҡатнашыусылар өсөн суд участкаһы бинаһы буйлап экскурсия ойошторолдо. Һуңынан аппарат хеҙмәткәрҙәре рәхмәт хаттары һәм почет грамоталары менән бүләкләнде.

Фото: Ейәнсура районы хакимиәтенең мәғлүмәт бүлеге.