Радий Хәбиров полиция генерал-лейтенанты Александр Прядкоға орден тапшырҙы

Башҡортостан Башлығы Радий Хәбиров Башҡортостан буйынса Эске эштәр министрлығының тантаналы йыйылышында  ҡатнашты. Төбәк Эске эштәр министрлығы етәксеһе полиция генерал-лейтенанты Александр Прядко вазифаһынан бушатылыуы тураһында рапорт биреүен иғлан итте.

Төбәк етәксеһе министрға эске эштәр органдарында күп йыллыҡ намыҫлы хеҙмәте өсөн рәхмәт белдерҙе.

– Һеҙ республиканың идара итеүсе командаһы өсөн Эске эштәр министрлығы коллективы менән тығыҙ хеҙмәттәшлектең ни тиклем мөһим булыуын беләһегеҙ. Бөгөн мин һеҙгә булған тәрән хөрмәтемде белдергем килә – юғары вазифалы етәкселәрҙән алып ябай хеҙмәткәрҙәргә тиклем. Хеҙмәтегеҙ өсөн рәхмәт, – тине Радий Хәбиров. – Һеҙҙең эшегеҙҙән беҙҙең республикабыҙҙа нисек йәшәүебеҙ тора һәм иң мөһиме – кешеләрҙең үҙҙәрен нисек тойоуы бәйле. Беҙ ауыр енәйәттәр һанының кәмеүен күрәбеҙ. Был һеҙҙең ҡаҙанышығыҙ, бының өсөн һеҙгә ҙур рәхмәт. Александр Александрович менән һәр әңгәмә республиканың министрлыҡҡа ниндәй ярҙам күрһәтә алыуы тураһындағы һорауҙан башланды. Беҙҙең тағы ла пландар бар әле, һәм һеҙҙе был йүнәлештә эшләйәсәкбеҙ тип ышандырам.

Полиция генерал-майоры Александр Прядко ведомство коллективына һәм республика етәкселегенә, хоҡуҡ һаҡлау органдарының шәхси составына  берлектәге емешле эш өсөн рәхмәт белдерҙе.

– Мин Башҡортостан буйынса Эске эштәр министрлығына етәкселек итеүем менән ғорурланам. Эске эштәр органдарында 33 йыл эшләү барышында мин үҙемдең намыҫым менән гармонияла хеҙмәт иттем. Мин әле үҙемдәТыуған илгә файҙа килтерерлек көс тоям, – тине Александр Александрович.

Тантаналы йыйылышта сығыш яһаған министрлыҡ һәм ведомство етәкселәре, эске эштәр ветерандары Александр Прядконың министр вазифаһындағы эшмәкәрлеген юғары баһаланы. Хеҙмәт бурысын үтәгәндәге фиҙакәрлеге һәм батырлығы өсөн Башҡортостан Башлығы Александр Прядконы Генерал Шайморатов ордены менән наградланы.

Фото: https://glavarb.ru/ru/