Судьяларҙың һайлау конференцияһы – суд системаһы тормошондағы мөһим ваҡиға

4 июндә Башҡортостан Республикаһы Юғары судында республика судьяларының XVI отчет-һайлау конференцияһы үтте.

Конференцияла Башҡортостан Республикаһы судьялары конференцияһы эшенең яңы редакцияһын ҡабул итеү һәм Башҡортостан Республикаһы Судьялар советы ултырыштарын үткәреү, шулай уҡ Башҡортостан Республикаһы судьялар советының һәм Республикаһы судьяларының квалификация коллегияһының яңы составын һайлау мәсьәләләре ҡаралды.

Унда Башҡортостан Республикаһы буйынса баш федераль инспектор Алексей Касьянов, Башҡортостан Республикаһы Юғары суды рәйесе Рәил Шәйҙуллин, Башҡортостан Республикаһының Судьялар советы рәйесе Татьяна Писарева, Арбитраж суды рәйесе Николай Архиереев, Республика судьяларының квалификация коллегияһы рәйесе Елена Михадюк, Республикала Суд департаменты идаралығы начальнигы Роберт Усманов, Юстиция эштәре буйынса дәүләт комитеты рәйесе Владимир Спеле ҡатнашты, шулай уҡ Юғары суд, Арбитраж суды судьяларынан 162 делегат, Өфө гарнизон хәрби суды, район, ҡала, район-ара судтары һәм мировой судьялар ҡатнашты.

Конференция делегаттарына тәбрикләү һүҙе менән Башҡортостан Республикаһы Юғары суды рәйесе Рәил Шәйҙуллин мөрәжәғәт итте.

– Башҡортостан Республикаһы судьяларының һайлау конференцияһы – төбәктең суд системаһы тормошонда мөһим ваҡиға. Был формаль сара ғына түгел, ә судьялар берләшмәһенең бойондороҡһоҙлоғон һәм үҙидараһын тәьмин итеүҙең төп механизмы. Тап бында, конференцияла, кадрҙар сәйәсәтенә, судтарҙың эшен ойоштороуға ҡағылышлы мәсьәләләр хәл ителә. Был айырыуса мөһим, сөнки судьяларҙың үҙидара органдары формалаша. Судьялар советының һәм Республика судьяларының квалификация коллегияһының яңы составтарына суд власының абруйын нығытыу буйынса эште дауам итергә теләйем. Башҡортостан Республикаһының Юғары суды үҙ сиратында һеҙгә ярҙам күрһәтәсәк, – тип билдәләне Рәил Шәйҙуллин.

Делегаттарға һәм саҡырылған кешеләргә Башҡортостан Республикаһы буйынса баш федераль инспектор Алексей Касьянов та тәбрикләү телмәре менән мөрәжәғәт итте.

– Рәсәй Федерацияһы Президентының Волга буйы федераль округындағы Тулы хоҡуҡлы вәкиле Игорь Анатольевич Комаров исеменән һеҙҙе сәләмләйем. Йыл һайын судьяларға ҡарата йөкләмә арта. Уларҙың һөнәри оҫталығына ла талаптар күтәрелә. Шуға ҡарамаҫтан, республика судтары ҡуйылған бурыстарҙы уңышлы үтәй. Беҙҙең берлектәге эш, мин баш федераль инспектор аппаратын һәм судьялар берләшмәһе органдарын күҙ уңында тотам, кадрҙар һайлап алыу буйынса Рәсәйҙә иң яҡшыларҙың береһе тип билдәләнә. Уҙған дүрт йылда Башҡортостанда Президент указдары менән 260-тан ашыу федераль судья тәғәйенләнгән. Бөгөн Республика судьялар советының элекке составына һәм судьяларҙың квалификация коллегияһына – профессиональ эше өсөн рәхмәт әйтергә, ә яңы һайланғандарға киләсәккә ышаныс һәм уңыш теләйем, – тине Алексей Касьянов.

Артабан конференция делегаттары судьялар берләшмәһе органдары етәкселәре – Башҡортостан Республикаһы Судьялар советы рәйесе Татьяна Писарева һәм Республика судтарының квалификация коллегияһы рәйесе Елена Михадюктың отчеттары тыңланды. Башҡарылған эш тураһында доклад менән Башҡортостан Республикаһында Суд департаменты идаралығы начальнигы Роберт Усманов сығыш яһаны.

Сара барышында Рәсәй Федерацияһы Судьялар советының, Башҡортостан Республикаһында Баш федераль инспекторҙың рәхмәт хаттары, шулай уҡ Республика судьялар советының “Рәсәйҙә суд реформаһына - 160 йыл”, “Башҡортостан Республикаһы Юғары судына - 100 йыл” юбилей миҙалдары һәм “Һөнәренә тоғролоҡ өсөн” награда билдәһе менән Судьялар советы һәм Республика судьяларының квалификация коллегияһы ағзалары билдәләнде.

Республика судьяларының XVI отчет-һайлау конференцияһында делегаттар асыҡ тауыш биреү юлы менән Башҡортостан Республикаһы судьялар советының, шулай уҡ Республикаһы судьяларының квалификация коллегияһының яңы составын һайланы.

Фото: vk.com/club.