Ялған таратҡан өсөн яуаплылыҡ бар!

Уҙып барған аҙнаның башында Башҡортостан Башлығы Радий Хәбиров исеменән муниципалитеттарға һәм власть органдарына сираттағы ялған бойороҡтар таратылды. Был юлы мутлашыусылар яғыулыҡ темаһына тотондо. Ялғанды “Фактчекинг по-башкирски” телеграм-каналы фашланы.

Хатта, хоҡуҡ һаҡлау органдарына яғыулыҡ етмәүгә бәйле ялған хәбәр таратылыу хаҡында тиҙ арала мәғлүмәт биреү, ә киң мәғлүмәт сараларына бындай факттар тураһында мәғлүмәт баҫтырыуҙан тыйылыу йөкмәтелә, тип әйтелә. Бойороҡҡа ярашлы, хоҡуҡ һаҡлау органдары йәмәғәт тәртибен тотороҡһоҙландырыуға йүнәлтелгән дөрөҫ булмаған мәғлүмәт таратыу ынтылыштарын асыҡлауҙы һәм туҡтатыуҙы контролдә тотоуҙы көсәйтергә тейеш. Хаттың дөрөҫлөккә тап килмәүе ябай ғына иҫбатлана: уның номерына иғтибар итергә кәрәк – РГ-1034. Радий Хәбиров ҡул ҡуйған һәм асыҡтан-асыҡ урынлаштырылған һуңғы бойороҡта РГ-350 тәртип номеры ҡуйылған.

“Пруфы” баҫмаһы Ҡырмыҫҡалы районында иген уңышы баҫыуҙа брезент аҫтында ята тип борслоу белдерҙе. Баҫма сираттағы тапҡыр республиканы кире яҡтан күрһәтергә тырышты, был күңелһеҙ йолаға әйләнде, тип тә ебәрҙе. Имеш, “бер кемгә лә, бер нәмә лә кәрәк түгел”.

Йәш аграрийҙарға ни өсөн игенде былай һаҡлауҙың норма икәнен аңлатабыҙ. БР Ауыл хужалығы министрлығынан хәбәр итеүҙәренсә, игенде баҫыу ситендәге бурталарҙа һаҡлау — уңыш йыйыу ваҡытында дөйөм ҡабул ителгән практика. Бындай ысул тулыһынса үҙен аҡлай. Көҙ аҙағында аграрийҙар бөтә көстәрен иген культураларын һуғыуға йүнәлтә, ямғырҙар һәм һыуыҡтар башланғансы уңышты йыйып алырға тырыша. Ҙур майҙандарҙа йыйылған игенде шунда уҡ келәттәргә сығарырға ваҡыт етмәй. Шуға күрә ул ваҡытлыса буртаға йыйыла, унда ҡыҫҡа ваҡыт һаҡлана ала. Ямғыр яуһа ла, 2-3 сантиметр ҡалынлыҡтағы өҫкө ҡатлам ғына һыуланасаҡ. Әгәр ул брезент менән ҡапланған икән, боҙолоу хәүефе бик әҙ. Был урып-йыйыу процесын оҙайтыуҙан һәм уңыштың бер өлөшөн тамырында серетеп ҡалдырыуҙан күпкә яҡшыраҡ.

Шуны ла билдәләп үтергә кәрәк, республикабыҙҙа иген һәм майлы культураларҙы һаҡлау буйынса ҡеүәт 4 миллион тоннаға яҡын етерлек. Күп хужалыҡтар йыл һайын үҙҙәренең һаҡлау мөмкинлектәрен арттыра, был уңыш менән һөҙөмтәлерәк идара итергә мөмкинлек бирә.

Салауат Юлаев һәйкәлен реставрациялау тураһындағы ялған һәм кире яҙмаларҙы күпме генә кире ҡаҡһаҡ та, “Пруфы” баҫмаһы һаман Көнбайыш һәм экстремистик каналдар тезистарын ҡабатлай. Һәр яңы эш этабынан һуң яңы фараздар һәм имеш-мимештәр барлыҡҡа килә.

Был юлы баҫма майҙанға барып килеүҙәрен бик сағыу һүрәтләгән. Әммә, күрәһең, уларҙың фейктар яҙыу өсөн фантазияһы бөткән, шуға күрә улар экстремистик коллегаларына ярарға тырыша, майҙанда башҡарылған эштәрҙе депрессиялы итеп һүрәтләй: майҙан етемһерәгән, ат һыбайлыһыҙ ҡалған, хатта һауа торошо ла күңелһеҙ, ә ҡоштар борсолоп ҡысҡырыша.

Кәңәш ябай: киләһе тапҡыр йөрөү өсөн ҡояшлы көндө һайлағыҙ! Реставрацияға килгәндә, беҙ уның ныҡ кәрәклектән килеп сығыуын күп тапҡыр аңлатып бирҙек. Эштәр һәйкәлдең авария хәлендә булыуы арҡаһында башлана. Әле монументты тарихи монтажлауҙан кире тәртиптә һүтеү процесы бара. Реставрациянан һуң һәйкәл шул уҡ тәртиптә йыйыла һәм тәүге ҡиәфәтенә ҡайтарыла, шулай уҡ фонтан һәм майҙан яңыртыласаҡ.

Хәтерегеҙгә төшөрәбеҙ, бөтә эштәр ҙә мәҙәни мираҫ объекттарын һаҡлау өлкәһендәге федераль ҡануниәткә ярашлы алып барыла. Закон боҙоуҙар өсөн яуаплы кешеләр хатта енәйәт яуаплылығына тарттырыла ала.

Стәрлетамаҡтағы “Авангард” предприятиеһындағы шартлау фонында провокаторҙар ярҙамында интернетта фейктар киң тарала башланы. Атыу һәм яныу тауыштары менән видеолар барлыҡҡа килә, әммә улар Стәрлетамаҡҡа ҡағылмай.

Халыҡты эвакуациялау тураһында бер ниндәй ҙә белдереүҙәр яһалмай, “ҙур янғын” һәм “зарарлы матдәләр бүлеп сығарыу” тураһында мәғлүмәт юҡ. Хәл контролдә, ҡала халҡына бер ниндәй ҙә ҡурҡыныс янамай.

Рәсми сығанаҡтарға ғына ышанығыҙ, паникаға бирелмәгеҙ һәм тикшерелмәгән видеоларҙы ебәрмәгеҙ. Мәғлүмәт ресурстары администраторҙарына һәм мөхәррирҙәренә раҫланмаған материалдарҙы таратмаҫҡа кәңәш итәбеҙ. Иҫегеҙҙә тотоғоҙ: ялған мәғлүмәт баҫтырған өсөн яуаплылыҡ ҡаралған.