Киләһе йыл сәйәси йәһәттән үтә ҡатмарлы буласаҡ

10 декабрҙә Өфөлә республика Башлығы, “Берҙәм Рәсәй”ҙең төбәк бүлексәһе етәксеһе Радий Хәбиров партияның Башҡортостан бүлексәһе конференцияһында ҡатнашты. Көн тәртибендә – алдағы осорға партиясылар алдында торған көнүҙәк мәсьәләләрҙе тикшереү.

Конференцияла ҡатнашыусыларға сәләмләү менән партияның Генераль Советы Секретары, Федерация Советы Рәйесенең беренсе урынбаҫары Владимир Якушев мөрәжәғәт итте.

“Берҙәм Рәсәй”ҙең Башҡортостан бүлексәһе төбәк командаһында – 130 меңдән ашыу фекерҙәш. Был киң перспективалы һәм айырым яуаплылыҡ менән ҡеүәтле актив. Һеҙҙең ярҙамығыҙ менән беҙҙең партия етди һөҙөмтәләргә өлгәшә. Республикала Халыҡ программаһы уңышлы тормошҡа ашырыла, партия проекттары үҫешә, мәктәптәр, юлдар, фельдшер-акушерлыҡ пункттары, почта бүлексәләре төҙөлә һәм яңыртыла. Торлаҡ-коммуналь хужалыҡ инфраструктураһы яҡшырҙы. Был эш халыҡтың наказдарына таянып дауам итәсәк.

Алғы һыҙыҡтағы яугирҙәребеҙгә ярҙам иткәндәре, “Миңлеғәле Шайморатов исемендәге штабтар” ирекмәндәр хәрәкәтенең эшен ойошторғаны өсөн айырыуса рәхмәт белдерәм. Һеҙ меңәрләгән тонна гуманитар ярҙам ебәрҙегеҙ. Ә һеҙҙең махсус хәрби операцияла ҡатнашыусыларҙың ғаиләләре хаҡында хәстәрлек күреү – халҡыбыҙҙың ысын илһөйәрлегенең һәм берҙәмлегенең сағыу миҫалы.

Төбәктең партия әҙерлегенең алдынғы үҙәктәренең береһе булараҡ эшен айырым билдәләйем. Башҡортостанда юғары партия мәктәбенең беренсе төбәк филиалы – йәш депутаттар өсөн сәйәси компетенциялар үҙәге асылды. Һеҙгә, Радий Фәрит улы, партия эштәренә йәлеп ителгәнегеҙ һәм фиҙакәрлегегеҙ өсөн рәхмәт белдерәм. Һеҙ ҡуйған темп тағы ла әһәмиәтлерәк ҡаҙаныштар өсөн етәргес булыр тип ышанам”, – тиелә мөрәжәғәттә.

 ***

Төбәк бүлексәһе етәксеһе Радий Хәбиров партияның республика халҡы мәнфәғәтендә һөҙөмтәле эшмәкәрлеген билдәләне.

– Тәү сиратта был ауыр йыл өсөн барығыҙға ла рәхмәт белдерәм. Махсус хәрби операцияға ярҙам итеү өсөн бергәләп башҡарған эшебеҙ өсөн. Был беҙҙең төп өҫтөнлөгөбөҙ. Бында ныҡлыҡ, сабырлыҡ, сыҙамлыҡ күрһәтергә кәрәк. Шуға күрә беҙ еңгәнсе ошо эшкә ынтылығыҙ, – тине Радий Хәбиров. – Ҡатмарлы финанс-иҡтисади хәлгә ҡарамаҫтан, беҙ бөтә йөкләмәләребеҙҙе үтәүҙе, социаль инфраструктураны үҫтереү менән шөғөлләнеүҙе дауам итәбеҙ. Ғәҙәттәгесә, Яңы йыл алдынан муниципалитеттарҙа күптән көтөлгән объекттар асыу планлаштырыла.

Төбәк бүлексәһе партия дисциплинаһының юғары кимәлен күрһәтә, был 2026 йылдың электораль циклын лайыҡлы үтергә ярҙам итәсәк, тип белдерҙе Башҡортостан Башлығы.

– Республикала илдә беренсе юғары партия мәктәбенең филиалы асылыуы яҡшы стимул булды. Беҙ Өфөгә сәйәси фекерләүҙе яҡшы «эшләткән» иң ҡыҙыҡлы спикерҙарҙы саҡырырға тырыштыҡ. Был эште дауам итәсәкбеҙ, – тине Радий Хәбиров. – Киләһе йыл сәйәси йәһәттән үтә ҡатмарлы буласаҡ. Рәсәй Дәүләт Думаһына һәм Өфө ҡала советына һайлауҙар көтөлә. Беҙҙә федераль парламентта ярайһы уҡ ҙур депутат корпусы бар, депутаттарҙың күпселеге был саҡырылышты лайыҡлы үтәне. Әгәр халыҡ уларға ярҙам итһә, улар Дәүләт Думаһында эшмәкәрлеген дауам итәсәк. Бер өлөшө икенсе эшкә күсәсәк. Беҙҙең өсөн ғәҙел көрәштә еңеү маҡсатлы рәүештә мөһим, һәм уны атҡарып сығасаҡбыҙ. Беҙгә таҙа еңеү кәрәк.

***

Конференция делегаттары төбәк сәйәси советы һәм контроль комиссияһы составына үҙгәрештәр ҡабул итте.

Сара аҙағында республика Башлығы Радий Хәбиров иң яҡшы урындағы бүлексәләргә партия наградаларын тапшырҙы.

https://glavarb.ru/upload/iblock/853/62w2tb3pzp51hx1nfrt08jjp9y6s1hhn/Spisok-nagrazhdennykh_ER-_2025.12.10_.pdf

Фото сығанағы: glavarb.ru.