Башҡортостан чиновниктары килеме хаҡында декларацияһын баҫтырмаясаҡ

Башҡортостанда дәүләт хеҙмәткәрҙәре килемдәре тураһында мәғлүмәтте баҫтырып сығарырға тейеш түгел, әммә контроль икенсе төрлө итеп алып барыласаҡ. Башҡортостан Башлығы Радий Хәбиров үҙенең Указы менән төбәк норматив акттарын федераль законға ярашлы итеп үҙгәртте.

2026 йылдың 1 ғинуарында Рәсәйҙә килем, мөлкәт һәм ошо характерҙағы йөкләмәләр тураһында мәғлүмәт биреүҙең яңы тәртибе тураһында закон ҡабул ителде.

Рәсәй Президенты Владимир Путин уға 2025 йылдың 28 декабрендә ҡул ҡуйҙы. Инициатива дәүләт хеҙмәткәрҙәрен һәм депутаттарҙы йыллыҡ килем тураһында декларациялар биреүҙән азат итә. Хәҙер иҫкергән система урынына “Посейдон” дәүләт мәғлүмәт системаһы аша өҙлөкһөҙ автоматлаштырылған мониторинг эшләй.

Система Росимуществонан, Федераль һалым хеҙмәтенән, Дәүләт авиация инспекцияһынан һәм башҡа органдарҙан йыйылған бөтә мәғлүмәтте анализлаясаҡ. Бынан тыш, һанлаштырыу ришүәтселек бәйләнештәрен тиҙ арала асыҡларға һәм уларҙы туҡтатырға мөмкинлек бирәсәк. Һүҙ декларациянан баш тартыу тураһында түгел, ә системаны камиллаштырыу һәм уны һанлы төргә күсереү тураһында бара.

Бынан тыш, ҡайһы бер осраҡтарҙа чиновниктарға ҡағыҙ декларация бирергә тура киләсәк, атап әйткәндә, дәүләт һәм муниципаль хеҙмәттәргә ингәндә йәки дәүләт корпорацияһында эшкә урынлашыуҙа. Шулай уҡ күсемһеҙ милек, ҡиммәтле ҡағыҙҙар менән ҙур килешеүҙәр төҙөүҙә отчет талап ителә. Әгәр уның суммаһы өс йыл эсендә ғаилә ағзаларының дөйөм килеменән артһа, декларацияны ла бирергә, финанслау сығанаҡтары тураһында ла һөйләргә тура киләсәк.

Айрат Нурмөхәмәтов фотоһы (архивтан).