Урманда һаҡһыҙлыҡ хаҡы – 2 миллион һумға тиклем

2026 йыл башынан Башҡортостан урмандарында янғын хәүефһеҙлеге ҡағиҙәләрен боҙоуҙың 26 осрағы асыҡланған. Ғәйеплеләргә ҡарата административ йоғонто саралары күрелә.

Бынан тыш, Бөрйән урмансылығында урман янғынына килтергән янғын хәүефһеҙлеге ҡағиҙәләрен боҙған кешегә ҡарата административ тикшереү ҡуҙғатылған. Рәсәй Федерацияһы Административ хоҡуҡ боҙоуҙар кодексының 8.32 статьяһының 4-се өлөшөнә ярашлы, был хоҡуҡ боҙоу өсөн уға 1 миллиондан 2 миллион һумға тиклем штраф янай. Штрафтан тыш, уға урман фондына килтерелгән зыянды тулыһынса ҡапларға, шулай уҡ янғын һүндереүгә сығымдарҙы ҡапларға тура киләсәк, был административ яза суммаһынан күп тапҡырға артығыраҡ булырға мөмкин.

– Урманға юлланған һәр кем ташланған шырпының йәки һүндерелмәгән усаҡтың хаҡы бөгөн миллионлап һумға иҫәпләнеүен аңларға тейеш. Беҙҙең өҫтөнлөклө бурыс – янғындарға юл ҡуймау, шуға күрә янғын хәүефе миҙгелендә патрулдәр һаны бер нисә тапҡырға арттырылды. Беҙ бөтә ресурстарҙы, шул иҫәптән пилотһыҙ авиацияны ла, ҡағиҙә боҙоусыларҙы асыҡлау өсөн файҙаланабыҙ. Билдәләп үтергә кәрәк, 2 миллион һумға тиклем административ штрафтарҙан тыш, урман ултыртыуҙарҙы юҡ иткән өсөн РФ Енәйәт кодексының 261-се статьяһы буйынса енәйәт яуаплылығы ҡаралған. Урманда вайымһыҙлыҡ – ул финанс көрсөгө һәм азатлыҡты юғалтыуға тура юл, – тип билдәләне урман хужалығы министры Марат Шәрәфетдинов:

Үткән йылдар статистикаһы язаның ҡотолғоһоҙ булыуын раҫлай.

Мәҫәлән, 2023 йылда Дүртөйлө урмансылығы биләмәһендә булған ике урман янғынында ғәйепле Краснокама район-ара суды ҡарары менән РФ Енәйәт кодексының 261-се статьяһының 1-се өлөшө буйынса ғәйепле тип танылды. Енәйәт яуаплылығынан тыш, ул дәүләткә 1,6 миллион һумдан ашыу түләргә бурыслы, был урман фондына килтерелгән зыянды ла, янғындарҙы бөтөрөүгә сығымдарҙы ла үҙ эсенә ала.

2023 йылда Тирлән урмансылығында ла шундай уҡ хәл була. Белорет район-ара суды урындағы кешене РФ Енәйәт кодексының 261-се статьяһының 1-се өлөшө буйынса енәйәт ҡылыуҙа ғәйепле тип тапты. Ҡағиҙә боҙоусыға бер йыл холоҡ төҙәтеү эштәре төрөндәге яза тәғәйенләнә, эш хаҡының 10 проценты дәүләт килеменә тотола. Бынан тыш, ғәйепле кешенән урман фондына килтерелгән зыян һәм янғынды һүндереү сығымдары түләтелә. Финанс йөкләмәләренең дөйөм суммаһы 5 миллион һум самаһы тәшкил итә.

Башҡортостан республикаһының Урман хужалығы министрлығы иҫкә төшөрә: урмандарҙа янғын хәүефһеҙлеге ҡағиҙәләрен боҙған өсөн административ ҡына түгел, енәйәт яуаплылығы ла ҡаралған (РФ Енәйәт кодексының 261-се статьяһы). Урман янғыны йәки янғын хәүефһеҙлеге ҡағиҙәләрен боҙған осраҡта ведомствоның төбәк диспетчер хеҙмәте телефоны буйынса кисекмәҫтән хәбәр итеүегеҙҙе һорайбыҙ: 8-347-218-14-14.

Сығанаҡ: Башҡортостан Урман хужалығы министрлығының матбуғат хеҙмәте.

Фото: "Башинформ".