Мостай Кәримгә бюст асылды

Мифтахетдин Аҡмулла исемендәге Башҡорт дәүләт педагогия университетында мәшһүр әҙип, Башҡортостандың халыҡ шағиры Мостай Кәримдең тыуыуына 100 йыл тулыу айҡанлы байрам саралары үтә. Ошо айҡанлы уҡыу йортоноң 3-сө корпусында бюст асылды. Уның авторы - Юрий Солдатов.

Ҡунаҡтарҙы педагогия университеты ректоры Салауат Сәғитов тәбрикләне: “Мәшһүр әҙип әйтмешләй, бында бөгөн "планетаның Ҡояшлы яғында йәшәгәндәр йыйылған. Беҙҙең өсөн ҙур байрам, тарихи ваҡиға. Яңы традицияға нигеҙ һалынды тип әйтергә була, сөнки Мостай рухы уҡыу йортон яҡтыртып торасаҡ”, - тине ул.

Сарала шағирҙың яҡындары - ҡыҙы Әлфиә Кәримова, ейәне Тимербулат Кәримов ҡатнашты. Әҙиптең ҡыҙы Әлфиә Кәримова сараның әһәмиәтлелеген билдәләне, атаһының педагогтар әҙерләгән уҡыу йортон айырыуса яратыуын әйтеп үтте.

- Атайым ҡасандыр уҡытыусы булырға хыялланған,аҙаҡ иһә ул үҙе уҡытыусыларҙың уҡытыусыһына әйләнде, - тине Әлфиә Кәримова.