Март айында заманының билдәле журналисы, шағир-фронтовик, Башҡортостандың атҡаҙанған мәҙәниәт хеҙмәткәре, СССР Журналистар һәм Яҙыусылар союздары ағзаһы Файыҡ Мөхәмәтйәновтың тыуыуына – 100 йыл. Ул замандаштары күңелендә сағыу публицист, талантлы шағир-фронтовик булып ҡалды.
Файыҡ Тимерйән улы Мөхәмәтйәнов 1921 йылдың 10 мартында Өфө губернаһы Бөрө өйәҙе (хәҙерге Башҡортостан Республикаһының Борай районы) Оло Баҙраҡ ауылында тыуған. Йәшләй генә Бөйөк Ватан һуғышында, унан һуң совет-япон һуғышында ҡатнаша.
Файыҡ Мөхәмәтйәнов ярты быуатҡа яҡын ғүмерен ижадҡа арнаған. Шиғырҙарында, мәҡәләләрендә автор һуғыш йылдары быуынының тормошо, уның яҡты өмөт-хыялдары тураһында яҙа, шул осор ваҡытындағы тормошто ғәжәп ентекле итеп һүрәтләй. Үҙе лә Ватанды фашистарҙан һаҡлауҙа ҡатнашып, аҙаҡтан Башҡортостандағы, илдәге тормошто яйға һалыуға ҙур өлөш индергән батыр яҙыусы-фронтовиктар быуынына ҡарай.
Бөйөк Ватан һуғышында ул Карел һәм Алыҫ Көнсығыш фронттарында була. Ватан һуғышы тамамланғас та хәрби хеҙмәттә ҡала: япон милитаристарына ҡаршы яуҙа ҡатнаша. Батырлыҡтары өсөн Ҡыҙыл Йондоҙ һәм II дәрәжә Ватан һуғышы ордендары, “Хәрби ҡаҙаныштары өсөн” миҙалы менән бүләкләнә.
Һуғыштан һуң мәктәптә хәрби етәксе, унан электровоз машинисы булып эшләй. Яҙмыш уны хатта Сахалин өлкәһенә алып барып еткерә. Бында ул парторг, диспетчер, шахта начальнигы ярҙамсыһы булып хеҙмәт итә.
1953 йылдан Файыҡ Мөхәмәтйәнов әүҙем яҙыша башлай, тап ошо саҡтан үҙен оҫта журналист итеп таныта. 1965 йылда Башҡорт дәүләт университетының филология факультетын тамамлап, юғары белемгә эйә була.
1954 йылдан 1981 йылға тиклем, хаҡлы ялға сыҡҡанғаса, “Совет Башҡортостаны” гәзитендә эшләй. Бында ул үҙ хәбәрсе, әҙәби хеҙмәткәр, бүлек мөдире вазифаларында көс түгә.
Файыҡ Мөхәмәтйәнов шиғриәт өлкәһендә әүҙем ижад итә, балалар өсөн дә яҙа. Очерк, публицистика жанрҙарында эшләргә ярата. Үҙ яҙмаларында автор хеҙмәти берҙәмлекте, халыҡтар араһындағы дуҫлыҡты, Тыуған илгә һөйөүҙе, ярҙамсыллыҡты данлай.
“Оҫта малай” исемле тәүге китабы 1960 йылда нәшер ителә. Файыҡ Мөхәмәтйәнов – 11 шиғырҙар һәм поэмалар йыйынтыҡтары авторы, шул иҫәптән – “Күңел көҙгөһө” (1972), “Әсәйемдең ҡулдары” (1981), “Көҙҙәремдең бағам күҙенә” (1991) һәм башҡалар. Уның әҫәрҙәре йәш быуынды әхлаҡи-эстетик тәрбиәләүгә ҙур өлөш индерә, яуаплылыҡҡа, ғәҙеллеккә, хеҙмәт һөйөргә өйрәтә. “Көҙҙәремдең бағам күҙенә” китабы иһә шағирҙы нескә тойғоло лирик итеп аса.
1957 йылда Өфөлә үткән СССР Журналистар союзы Башҡортостан бүлексәһенең ойоштороу конференцияһында Файыҡ Мөхәмәтйәнов тәүге журналистар танытмаһын алғандар араһында була.
Замандаштары уны ихлас, асыҡ, изге күңелле кеше итеп хәтерләй. Шағир-журналист уҡыусылары менән осрашырға, улар менән йәнле аралашырға яратты. Айырыуса мәктәп балалары менән булған осрашыуҙарҙы көтөп алыр була.
Ҡәләм оҫтаһының тырыш хеҙмәте “Башҡортостандың атҡаҙанған мәҙәниәт хеҙмәткәре” тигән маҡтаулы исем менән баһаланды, әҙәбиәтте үҫтереүҙәге роле иһә “Почет Билдәһе” ордены менән билдәләнде.
Файыҡ Тимерйән улы Мөхәмәтйәнов 2009 йылдың 2 июнендә Өфөлә вафат була. Билдәле яҡташтарының иҫтәлеген мәңгеләштереү маҡсатында борайҙар 2011 йылдың 2 апрелендә Оло Баҙраҡ ауылы мәҙәниәт йортонда әҙәби музей аса. Бында уның фотоһүрәттәре, төрлө документтар, ҡулъяҙмалары һаҡлана.
Ил хаҡына көсөн биргән генә
Бар оҙоно, бар бик ҡыҫҡаһы,
Ябай ғына түгел улар, түгел...
Күрә белһәң – ғүмер ҡиссаһы.
Бәхетле мин, шуға бәхетле,
Ил хаҡына көсөн биргән генә
Ҡара тапһыҙ бәхет-тәхетте!
Тыуған ере – Башҡортостан,
Йәшәйем тип, шиңмәйем тип,