Күренекле ғалим-психолог, билдәле йәмәғәт эшмәкәре Вадим Сафин Ейәнсура районының 2-се Назар (хәҙер – Яңы Себенле) ауылында тыуған. Үҫмер тәүҙә – Яңы Себенле ете йыллыҡ мәктәбен, унан һуң Желтый педагогия училищеһын тамамлай. Бала саҡтан уҡ үҙаллылығы, яуаплылығы менән тиҫтерҙәренән айырылып тора ул.
1958 йылда егет Ырымбур дәүләт педагогия институтын ҡыҙыл диплом менән тамамлай. Психология уҡытыусыһы Эмиль Беркович, уҡыусыһының фекерләү һәләтен, ҡыҙыҡһыныусанлығын, психологик тикшеренеүҙәргә ылығыуын тойоп, уға ошо фән менән етди шөғөлләнергә кәңәш итә.
Вадим Сафиндың педагогик эшмәкәрлеге Ырымбур өлкәһе Ҡыуандыҡ районының Октябрь урта мәктәбендә башлана. 1959–1962 йылдарҙа ул Ейәнсура районы хакимиәтенең халыҡ мәғарифы бүлегендә инспектор булып эшләй, артабан Стәрлетамаҡ педагогия институтында (хәҙер – Башҡорт дәүләт университетының Стәрлетамаҡ филиалы) психологиянан уҡыта. Артабан Мәскәү педагогия институтының аспирантураһына уҡырға инә һәм академик Артур Петровский етәкселегендә психология буйынса кандидатлыҡ диссертацияһын яҡлай.
45 йыл дауамында ғалимдың педагогик һәм ғилми эшмәкәрлеге Башҡорт дәүләт педагогия институты (хәҙер – М. Аҡмулла исемендәге Башҡорт дәүләт педагогия университеты) менән бәйле булды. Вадим Сафиндың һөнәренә сикһеҙ тоғролоғона, Башҡортостанда психология ғилемен үҫтереүгә һалған тырышлығына һоҡланырға ғына ҡала. Уның башланғысы менән педагогия институтында республикала беренсе психология кафедраһы асыла һәм Вадим Фәтхи улы уның мөдире була.
Бер үк ваҡытта, 1970 – 1988 йылдарҙа, тынғыһыҙ шәхес хужалыҡ иҫәбендәге социаль-психологик лаборатория ойоштора һәм уға етәкселек итә. Ул ҙур сәнәғәт предприятиеларының заказдарын үтәй. Вадим Сафин Рәсәй юғары уҡыу йорттары араһында беренсе булып Башҡорт дәүләт педагогия институтында Юғары практик психологтар курсын аса, Башҡортостанда психология фәнен үҫтереүгә тос өлөш индерә. Был курста 1988 – 2013 йылдарҙа 350-нән ашыу дипломлы психолог әҙерләнә. Әле улар практик психологияның төрлө йүнәлештәрендә уңышлы эшләй. 1996 йылда Вадим Фәтхи улы Башҡорт дәүләт педагогия институтында “Психология” белгеслеге буйынса аспирантура асыуҙы хәстәрләй.
1990 йылда Вадим Сафинға профессор ғилми дәрәжәһе бирелә. Ул – һигеҙ монография һәм уҡыу ҡулланмаһы, 200-ҙән ашыу фәнни һәм ғилми-методик хеҙмәт авторы. Ғалим 20-нән ашыу фән кандидатын әҙерләгән, уларҙың етәүһе психология буйынса кандидатлыҡ диссертацияһы яҡлаған.
Вадим Фәтхи улының хеҙмәттәре хаҡында һүҙ алып барғанда, башҡорт гимназияларында гуманитар фәндәрҙе уҡытыу концепцияһын төҙөү буйынса тынғыһыҙ эшмәкәрлеген дә билдәләргә кәрәк. Уның етәкселегендәге бер төркөм БДУ һәм БДПУ ғалимдары ошо концепция өҫтөндә эшләй. Ҡазан ҡалаһында үткән милли мәктәптәрҙә гуманитар фәндәрҙе уҡытыуға арналған халыҡ-ара конференцияла был концепция бер тауыштан хуплана. Вадим Фәтхи улы, концепция идеяларына таянып, Күмертау, Сибай, Баймаҡ һәм башҡа ҡалаларҙа Башҡортостан Мәғариф министрлығының башҡорт гимназияларын асыу һәм уларҙы милли кадрҙар менән тәьмин итеү буйынса комиссияларына етәкселек итте.
Яҡташымдың йәмәғәт эшмәкәрлеге лә иғтибарға лайыҡ. Ул оҙаҡ йылдар СССР психологтар йәмғиәтенең Пермь ҡалаһындағы Урал бүлексәһе рәйесе урынбаҫары, Башҡортостан Мәғариф министрлығы коллегияһы ағзаһы булды. Үткән быуаттың 90-сы йылдарында Вадим Фәтхи улы Башҡортостандың үҫеше өсөн күп көс түкте, байтаҡ йылдар Башҡортостан аҡһаҡалдары ҡоро рәйесе булып та эшләне.
Вадим Фәтхи улының фәнни-популяр мәҡәләләре хәҙерге тормоштоң көнүҙәк проблемаларын сағылдырыуы менән әһәмиәтле. Ғалим төрлө йылдарҙа “Башҡортостан уҡытыусыһы”, “Башҡортостан ҡыҙы” журналдарының, “Башҡортостан” гәзитенең лауреаты булды.
Тырыш хеҙмәте өсөн абруйлы ир-уҙаманға “БАССР-ҙың атҡаҙанған уҡытыусыһы”, “Башҡортостан Республикаһының атҡаҙанған фән эшмәкәре”, “Башҡортостандың мәғариф отличнигы”, “Рәсәйҙең почетлы юғары һөнәри белем биреү өлкәһе хеҙмәткәре” тигән маҡтаулы исемдәр бирелде. Ул шулай уҡ В.А. Сухомлинский исемендәге миҙал менән дә бүләкләнде.
Профессор Сафин – Америка гуманистик йүнәлештәге психологтар ассоциацияһының һәм Халыҡ-ара психологик фәндәр академияһының академигы, ләкин иң мөһиме – ошо маҡтаулы исемдәр артында Шәхес һәм Уҡытыусы тора. Ул уҡыусыларына сифатлы, тәрән белем биреп кенә ҡалманы, өҙлөкһөҙ һөнәри үҫешкә илһамландырып, ялған ҡиммәттәрҙән арындырып, ирекле һәм аҡыллы фекерләргә лә өйрәтте.
Вадим Фәтхи улы һәр ваҡыт тыуған районы уҡытыусылары менән тығыҙ бәйләнеш тотто, педагогтарҙың август кәңәшмәләрендә ҡатнашты. Ейәнсура районы йәштәренә уҡыуҙарында ярҙам итте, улар араһынан психолог һөнәрен һайлаусылар һәм фән кандидаттары ла бар.
Арҙаҡлы шәхесебеҙ быйыл 7 сентябрҙә 88 йәшендә беҙҙең аранан китеп барҙы һәм тыуған төйәгендә – районыбыҙҙың Яңы Себенле ауылы зыяратында ерләнде.
Ошо көндәрҙә Мифтахетдин Аҡмулла исемендәге Башҡорт дәүләт педагогия университеты етәкселеге В.Ф. Сафиндың яҡты иҫтәлегенә арналған фәнни-ғәмәли конференция үткәрҙе. Унда 2005–2018 йылдарҙа университет ректоры, Башҡортостан Дәүләт Йыйылышы – Ҡоролтайҙың Мәғариф, мәҙәниәт, йәштәр сәйәсәте һәм спорт буйынса комитеты рәйесе Р.М. Әсәҙуллин, фән докторҙары, профессорҙар Р.М. Фәтихова, Л.А. Әмирова, Г.Р. Шафиҡова һәм башҡа күп ғалимдар сығыш яһаны. Вадим Фәтхи улы етәкселегендә практик психологияның төрлө йүнәлештәрендә уңышлы эшләгән уҡыусыларының сығыштары ла ҙур иғтибар менән тыңланды.
Конференция бик йылы ижади мөхиттә үтте. Уның йомғаҡтары буйынса мәҡәләләр йыйынтығы сығарырға һәм сараны йыл һайын үткәрергә ҡарар ителде.
Вадим Фәтхи улы Сафин ғалим һәм абруйлы уҡытыусы, юғары кимәлдәге профессионал, көслө рухлы шәхес булды. Тормошто бөтә сағылыштарында ла яратҡан ошондай кешеләр арабыҙҙа күберәк осраһын ине…
Юлай СОЛТАНБАЕВ.