Сәләмәт йәшәү рәүеше – үҙе бер фән

Был аҙнала баш ҡаланың ВДНХ-ЭКСПО комплексында “Башҡортостанда һаулыҡ һаҡлау аҙналығы” медицина форум-күргәҙмәһе эшләне. Дүртенсе тапҡыр уҙғарылған сараның абруйы юғары: быйыл, мәҫәлән, Рәсәйҙең 17 төбәгенән 160-тан ашыу компания ҡатнашҡан. Унан тыш, форум сиктәрендә һаулыҡ һаҡлау тармағындағы яңылыҡтарҙы күрһәтеү, уртаҡ проблемаларҙы хәл итеү, тәжрибә уртаҡлашыу йәһәтенән бихисап саралар ойошторолдо. Шул иҫәптән кисә “Сәләмәт республика” проектының форсайт-сессияһы ла әһәмиәтле башланғыстарҙың береһе булды.

Сессияның төп йүнәлешен республика Хөкүмәтенең Премьер-министры урынбаҫары вазифаһын башҡарыусы Ленара Иванова бил­дәләне:

– Сәләмәтлек һаулыҡ һаҡлауҙан ғына тормай. Дәүләт халҡы – балалар, эшкә яраҡлылар, оло йәштәге­ләр – һәммәһе лә һау булһын өсөн медицина тармағының, төрлө ауы­рыу­ҙарҙы асыҡлау һәм дауалау алым­дарының алға китеүе генә ет­мәй, ә кешеләрҙе сәләмәт йәшәү рә­үешенә ылыҡтырырға, сирҙәрҙе булдырмау юлдарын барларға, уларҙы иҫкәртеү йәһәтенән ҙур эш алып барырға кәрәк. Ҡыҙғанысҡа ҡаршы, статистика шатландырмай – илдең эшкә яраҡлы йәштәге халҡы кәмей бара. Шуға ла сәләмәтлеккә ҡағы­лышлы ил кимәлендә саралар күреү фарыз: был дөрөҫ туҡланыуҙан башлап, спорт менән шөғөлләнеүгә, психологик һаулыҡты хәстәрләүгә лә ҡайтып ҡала. Бөгөнгө сессияның һөҙөмтәһе булараҡ, беҙ аныҡ тәҡдим­дәр әҙерләргә тейеш, – тине.

Сессияла шулай уҡ Мәскәү ҡу­нағы, Халыҡ-ара медицина кластеры фонды директоры урынбаҫары, танылған табип Илдар Хәйруллин ҡатнашты. Уның ҡыҙыҡлы, йәнле сы­ғышының төп фекере сәләмәт­лектең, тәүге сиратта, кешеләрҙең тор­мош рәүешенә, нимә ашауына, ниндәй һауа һулауына, ниндәй һыу эсеүенә ҡайтып ҡалды. Сәләмәт милләт тәрбиәләүҙә спорттың баһа­лап бөткөһөҙ роль уйнауын, тормош­тағы барлыҡ ҡиммәттәр, өҫтөнлөклө йүнәлештәр фәҡәт ғаиләлә тәрбиә­ләнеүен дә билдәләп үтте спикер.

Билдәле психолог, Республика клиник психотерапия үҙәгенең баш табибы Илгиз Тимербулатов иһә “барлыҡ проблемалар баштан башлана” тип белдерҙе, халыҡтың психологик сәләмәтлеге әүҙем ҡаҡша­ғанлығын, быға көндәлек стрестар­ҙың тәьҫир итеүен билдәләне.

Сессияның эшен шулай уҡ диетологтар, фитнес-тренерҙарҙың сығышы ла йәнләндерҙе, сөнки уртаҡ проблеманы төрлө яҫылыҡтан сығып баһалау уны хәл итеү юлдарын тиҙерәк асыҡларға ярҙам итә.