Бәхет асҡыстары тапшырылды

Күптән түгел Әбйәлил районында йәнә дүрт етем балаға фатир асҡыстары тапшырылды.

– Һәр кемдең өйлө булыуы – ҙур ҡыуаныс. Үҙ йортоғоҙҙа ярат­ҡан ғаиләгеҙ менән йәшәргә, балалар үҫтерергә яҙһын. Һәр бе­ре­геҙгә йорт йылыһы теләйем, ки­ләсәктә, быуын нығытҡас, хыялы­ғыҙҙа йөрөткәнсә мөһабәт йорттар ҙа һалып сығырһығыҙ. Хә­ҙер иң мөһиме – кеше тупһа­һында йөрөмәй, үҙ ҡыйғығыҙҙың булыуы шарт, – тине район хаки­миәте башлығы Илдар Нафиҡов.

Әйткәндәй, районда “Ата-әсә ҡа­рауынан мәхрүм ҡалған етем балаларға социаль ярҙам күрһә­теү” ҡарарына һәм “Етемдәрҙе һәм ата-әсә ҡарауынан ҡалған балаларҙы торлаҡ менән тәьмин итеү” республика программаһына ярашлы маҡсатлы эш алып барыла. Районда йәнә 16 йорт төҙөләсәк.

Йәштәр исеменән рәхмәт һүҙе менән Зиләрә Йосопова сығыш яһа­ны. Ул район етәкселегенә, опека бүлегенә һәм йортто төҙөү­селәргә оло рәхмәттәрен еткерҙе.

Зиләрәнең шатлығын уртаҡ­лашырға уның опекуны – инәйе Зилә Ғайсина ла килгән.

– Быйылғы йыл Зиләрә өсөн уңышлы булды. Ҡыҙыбыҙ Сибай институтын уңыш­лы тамамлап, ҡулына диплом алды һәм өй­лө булды. Үткән йыл ағаһы Вәсил дә йортло булыу бәхетен кисерҙе, туғандар бер-береһе менән аралашып йәшәр, уның өйөнөң һең­леһенекенә яҡын булыуы күңелде күтәрҙе, – ти Зилә ханым.

Йортло булыусылар араһынан Гөлсибәр Кейекбаева менән Луиза Шәрәфетдинова – йәш әсәләр. Ғаиләле йәштәр өсөн торлаҡлы булыу – икеләтә шатлыҡ.

Ысынлап та, фатир асҡысы ғына түгел, оло тормошҡа бәхет асҡысы алған етем­дәрҙең күңелдәрендә ниҙәр кисереүен ҡағыҙға һыйҙырыу мөмкин түгел. Ниһайәт, уларҙың да китек күңеленең бер өлөшө булһа ла тулыланды. Киләсәктә уларҙың һәм­мәһенә лә ошо матур йорттарында бә­хетле сабый тауышы яңғыратып, донъялағы иң бәхетле ата-әсәй булып йәшәргә яҙһын!