Таҙлар халҡының шатлығы сикһеҙ

“Иҫәнғол Өфө ҡалаһынан йыраҡта урынлашҡан, Ырымбур өлкәһе ме­нән сиктәш, – тип яҙған Әнүәр Кил­де­бәков. – Ейәнсура районында ниҙәр булып ятҡанын беләһегеҙме? Район үҙәге Иҫәнғол, шулай уҡ бүтән ауылдар ҙа күҙгә күренеп төҙөкләнә, күр­кәмләнә. Хәҙер халыҡ тырышып донъя көтә, ҡасандыр булып алған эске­лек, беҙҙеңсә әйткәндә, араҡы ме­нән шаярыуҙар, яҙ ирегән ҡар бөртөгөләй, юҡҡа сыҡты. Гәзиттә бы­на ошо тырыш яҡташтарымды, йә­нә эшҡыуарҙарҙы, ҡыҫҡаһы, яҡ­шы­лыҡты йышыраҡ күрһәтһәгеҙ ине”.

Әйткәндәй, Яңы йыл алдынан Ейән­сура районында ҡыуаныслы ва­ҡиға теркәлде – Таҙлар ауылында ба­лалар баҡсаһы асылды. Ейәнсура районы хакимиәте башлығы Дәмин Юланов билдәләүенсә, төҙөлөш бары­шында ҡытыршылыҡтар күҙәтел­мә­гән, барыһы ла планға ярашлы баш­ҡа­рылған. Ғөмүмән, мәғариф тар­мағы – өҫтөнлөклө йүнәлештәрҙең бе­реһе, белем биреү учрежде­ние­ла­ры­ның матди-техник базаһын яҡ­шыр­тыуға йылдан-йыл иғтибар арта.

– Балалар баҡсаһы 60 урынға иҫәпләнгән, – тип һөйләй Дәмин Марат улы. – Ул заман талаптарына ту­лыһынса яуап бирә. Кескәйҙәргә һәр йәһәттән дә үҫеү өсөн шарттар тыу­ҙырылған.

“Йәйғор” балалар баҡсаһы “Баш­ҡортостандың 100 йыллығына – 100 объект!” программаһы нигеҙендә тө­ҙөлгән. Тантанала мәртәбәле ҡунаҡ­тар ҡатнашты. Таҙлар халҡының шатлығын уртаҡлашырға Дәүләт Йыйылышы – Ҡоролтай депутаты Әлфәрис Байсурин да килгән ине.

Шуныһы иғтибарға лайыҡ: балалар баҡсаһының сафҡа инеүе республика етәкселегенең ауылдарҙы комплекслы үҫтереүгә етди иғтибар бүлеүе тураһында һөйләй. Һүҙ ҙә юҡ, ауыл кешеләренең ҡыуанысы сик­һеҙ. Өс бала әсәһе Альбина Исмә­ғи­лева белдереүенсә, уға балалар баҡса­һына йөрөү бәхете тәтемәгән, әсәһе эштә саҡта һәр ваҡыт өләсәһе янында булған. Уның ҡарауы, ғәзиздәренең барыһын да нәҡ ошо өр-яңы балалар баҡсаһына йөрөтәсәк.

– Бар матурлыҡты үҙ күҙҙәрем менән күреү өсөн, әхирәттәремә һөй­ләү өсөн бинаның эсенә инеп сыҡтым, – тип шатлана әңгәмәсем. – Бында барыһы ла үҙ урынында, минән бигерәк бәләкәстәрем ҡыуанасаҡ.

Ейәнсура районы.