+20 °С
Болотло
Социаль мәсьәлә
29 Май 2020, 06:04
“Ярҙамдары өсөн рәхмәт!”
Күптән түгел “Берҙәм Рәсәй” партияһы тарафынан ғәмәлгә индерелгән “Өйҙә уҡырға ярҙам ит” федераль программаһы нигеҙендә республика муниципалитеттарындағы ишле һәм аҙ тәьмин ителгән ғаиләләр өсөн 500 планшет тапшырылды. Урындарҙа улар сығарылыш имтихандары һынауҙарын уңышлы үтеп, юғары уҡыу йорттарына һәм колледждарға инһен өсөн ХI класс уҡыусыларына таратылды.
Күптән түгел “Берҙәм Рәсәй” партияһы тарафынан ғәмәлгә индерелгән “Өйҙә уҡырға ярҙам ит” федераль программаһы нигеҙендә республика муниципалитеттарындағы ишле һәм аҙ тәьмин ителгән ғаиләләр өсөн 500 планшет тапшырылды. Урындарҙа улар сығарылыш имтихандары һынауҙарын уңышлы үтеп, юғары уҡыу йорттарына һәм колледждарға инһен өсөн ХI класс уҡыусыларына таратылды.
Ҡулайламалар арауыҡта белем биреү программаларын тормошҡа ашырыу өсөн тапшырыла. Улар “Берҙәм Рәсәй”ҙең төбәк бүлексәһе, республика Башлығы Радий Хәбировтың башланғысы менән Рәсәй юристар ассоциацияһы тарафынан бүленгән аҡсаға һатып алынған.
Белорет районының да 17 ғаиләһенә ошондай уҡ бәхет йылмайҙы – көтмәгәндә улар планшетлы булды.
Зыяевтар Белорет ҡалаһында йәшәй, ғаиләлә тәрбиәләнгән өс ҡыҙ ҙа 3-сө мәктәптә белем ала. Лилиана – туғыҙынсыны, Милана икенсене тамамлай, ә баш балалары – Диана сығарылыш класс уҡыусыһы.
Ғаилә башлығы Илгиз Хәмит улы “Белорет пружинаһы” йәмғиәтендә оператор булып хеҙмәт итә, Фәүзиә Марс ҡыҙы – социаль хеҙмәткәр.
– Коронавирус инфекцияһы таралыу хәүефе арҡаһында арауыҡта белем алыуға күскәс, ҡыҙҙарыбыҙға өйҙә шөғөлләнеү проблема тыуҙырҙы. Өсөһө лә уҡыусылар бит, етмәһә, ике ҡыҙыбыҙ сығарылыш кластарында уҡый.
Хөкүмәтебеҙгә күп балалы ғаиләләрҙе хәстәрләгәндәре өсөн рәхмәттән башҡа һүҙ юҡ. Иң тәүҙә аҙыҡ-түлек йыйылмалары алып шатландыҡ. Дианаға планшет тапшырғандан һуң, ҡыҙҙарға уҡыуы күпкә еңеләйҙе. Мәктәп директоры Владимир Дахтинға, класс етәксеһе Светлана Черноусоваға һәм, әлбиттә, мөһим проектты тормошҡа ашырып йәш быуынды шатландырған “Берҙәм Рәсәй”гә ҙур рәхмәт.
Ә инде Президентыбыҙҙың 3 – 15 йәшлек балаларға ярҙам маҡсатында 10 мең һумлыҡ бер тапҡыр түләү тураһында Указға ҡул ҡуйыуын бигерәк тә ҡыуанып ҡабул иттек, – ти Фәүзиә Марс ҡыҙы.
2011 йылда Зыяевтар ҡаланың Выселки-2 биҫтәһендә күп балалы ғаиләләргә ярҙам программаһы сиктәрендә ер биләмәһе ала. Әле унда ҙур итеп йорт һалалар.
– Тормошта юғалып ҡалмаһындар өсөн, ҡыҙҙарыбыҙҙы хеҙмәткә өйрәтеп үҫтерергә тырышабыҙ. Улар – беҙҙең ярҙамсыларыбыҙ, йортта ла, баҡсала ла ихлас эшләйҙәр. Быйыл да күп итеп йәшелсә, еләк-емеш ултырттыҡ. Магазиндыҡы үҙең үҫтергәнгә етмәй инде. Өҫтәүенә ғаилә бюджетына ла ярайһы уҡ ярҙам, – ти күп балалы әсә.
Бүләккә бигерәк тә Диана шат.
– Быға тиклем өсөбөҙгә бер ноутбук ине. Арауыҡта уҡытыуға күскәс, ҡыйынлыҡтар килеп сыҡты. Өйгә эштәр күбәйҙе, һәр кемдең үҙ дәресе, үҙаллы шөғөлләнергә лә кәрәк. Ҡайһы ваҡыт бәхәсләшеп тә китә инек.
Мин бирелгән һәр күнегеүҙе ваҡытында башҡарырға тырышам, шулай еңелерәк. Яратҡан предметтарым – рус әҙәбиәте, физкультура һәм башҡорт теле. Математика һәм физиканан имтихан тапшырырға йыйынам. Ниндәй уҡыу йортон һайларымды әлегә аныҡ хәл итмәгәнмен, әммә шуныһын әйтә алам – ул төҙөлөш тармағы менән бәйле буласаҡ. Республика етәкселегенә беҙгә ярҙам иткәндәре өсөн ҙур рәхмәт, – тине Диана.
Лилиана ла 9-сы класты тамамлағас, мәктәптә уҡыуҙы артабан дауам итергәме, әллә колледжға инергәме, тип баш вата.
– Мәктәптә уҡытыусы барыһын да аңлатып төшөндөрә, ә дистанцияла уҡыу ҡатмарлыраҡ: үҙаллы күп эшләргә, өйрәнергә тура килә. Планшет өйҙә уҡыу процесын күпкә еңеләйтте, – тип һүҙгә ҡушылды ҡыҙ.
Марина САРАНЦЕВА, Белорет районы хакимиәтенең мәғариф идаралығы начальнигы:
– Пандемия уҡыу процесына ҙур үҙгәрештәр индерҙе. Башланғыс класс уҡыусылары өсөн уҡыу йылы – 22 майҙа, ә ҡалған уҡыусылар өсөн 29 майҙа тамамланды. 9-сы кластар өсөн һайланған предметтар буйынса имтихандар үткәрелмәйәсәк.
Төп дәүләт имтихандарын юҡҡа сығарыу һәм 11-се кластар өсөн Берҙәм дәүләт имтихандарын кәрәк осраҡта ғына тапшырыу тураһында мәсьәлә хәл ителә.
Имтихандарға әҙерлек эше беҙҙә күптән башланды, сараны уҙғарыу пункттары билдәләнгән. БДИ үткәргәндә бөтә санитар норма талаптары үтәләсәк, аудиторияларҙа уҡыусылар һаны кәметеләсәк. Быны иҫәпкә алып, резерв пункттар, аудиториялар ҙа әҙерләнгән.
Һуңғы ҡыңғырау тантанаһын, сығарылыш кисәләрен уҙғарыуҙың төрлө варианттарын ҡарайбыҙ.
12 майҙан балалар баҡсалары эшләй башланы. Уларҙа ата-әсәһе эшкә сыҡҡан балалар өсөн дежур төркөмдәр ойошторолған. Балалар учреждениеларында ла санитар талаптар етди күҙәтелә.
