+24 °С
Ямғыр
Социаль мәсьәлә
6 Октябрь 2020, 08:47
Баҡсаға хоҡуҡты теркәнегеҙме?
Баҡсасылыҡ өсөн тәғәйенләнгән ер участкаларында урынлашҡан баҡса һәм торлаҡ йорттарға хоҡуҡты “дача амнистияһы” буйынса теркәү тамамланыуға йылдан аҙыраҡ ваҡыт ҡалды. “Амнистия”нан файҙаланып өлгөрмәгән Башҡортостан халҡына нимә эшләргә? Был турала “Росреестр”ҙың республика идаралығы етәксеһе ярҙамсыһы Наталья ШАҺИЕВА һөйләне.
Баҡсасылыҡ өсөн тәғәйенләнгән ер участкаларында урынлашҡан баҡса һәм торлаҡ йорттарға хоҡуҡты “дача амнистияһы” буйынса теркәү тамамланыуға йылдан аҙыраҡ ваҡыт ҡалды. “Амнистия”нан файҙаланып өлгөрмәгән Башҡортостан халҡына нимә эшләргә? Был турала “Росреестр”ҙың республика идаралығы етәксеһе ярҙамсыһы Наталья ШАҺИЕВА һөйләне.
– “Дача амнистия”һы аныҡ ҡына ҡасан тамамлана?
– Баҡсасылыҡ менән шөғөлләнеү өсөн тәғәйенләнгән ерҙә һалынған баҡса һәм торлаҡ йорттарға хоҡуҡты теркәүҙең ябайлаштырылған тәртибе 2021 йылдың 1 мартына тиклем ғәмәлдә ҡала. Тап ошо көнгә тиклем граждандар күсемһеҙ милеккә хоҡуғын “дача амнистияһы” буйынса теркәү мөмкинлегенә эйә.
– Бының өсөн нимә эшләргә?
– Баҡса йәки торлаҡ йортҡа хоҡуҡты теркәү өсөн иң элек кадастр инженерын саҡыртырға кәрәк. Һеҙ алдан уҡ үҙаллы тултырып ҡуйған декларация нигеҙендә (формаһын интернеттан алырға була) ул йорттоң техник планын төҙөр. Артабан 350 һум күләмендә дәүләт пошлинаһы түләп, йортто кадастр иҫәбенә ҡуйыу һәм уға хоҡуҡты теркәү тураһындағы ғариза менән күп йүнәлешле үҙәк офисына мөрәжәғәт итергә ҡала. Әйткәндәй, ғаризаға кадастр инженеры әҙерләгән техник план яҙылған дискты ла теркәү шарт.
– “Дача амнистияһы”нан файҙаланып өлгөрмәгәндәрҙе, уның ваҡыты тамамланғас, ниндәй үҙгәрештәр көтә?
– Ниндәйҙер сәбәп арҡаһында был эште киләһе йылдың 1 мартына тиклем башҡарып өлгөрмәгәндәргә урындағы үҙидара органына күсемһеҙ милек объектын төҙөй башлау тураһында белдереү ҡағыҙы ебәрергә, уға тейешле документтарҙы теркәргә, төҙөлөш тамамланғас, был хаҡта ла хәбәр итергә тура киләсәк. Дәүләт власы, урындағы үҙидара органдар, граждандан төҙөлөштөң тамамланыуы тураһындағы белдереүҙе һәм башҡа кәрәкле мәғлүмәттәрҙе алғандан һуң, ете эш көнөндә “Росреестр”ҙың Башҡортостан идаралығына күсемһеҙ милекте кадастр иҫәбенә ҡуйыуға һәм уға милек хоҡуғын теркәүгә документтарҙы тапшырырға тейеш. Башта улар баҡса йәки торлаҡ йорттоң ҡануниәт талаптарына тап килеүен тикшерә.
– Мәғлүм булыуынса, “дача амнистияһы” буйынса баҡса йортона ғына түгел, башҡа күсемһеҙ милек объекттарына ла хоҡуҡты теркәргә мөмкин...
– Кешегә Рәсәйҙең Ер кодексы ғәмәлгә индерелгәнгә, 2001 йылдың 30 октябренә тиклем ғүмерлек мираҫ итеп ҡалдырылған йәки срокһыҙ файҙаланыуға тапшырылған ер участкаһына ла милек хоҡуғын ябайлаштырылған тәртиптә теркәргә мөмкин. Тик граждандың ҡулында ергә хоҡуҡты билдәләгән ошондай документ: таныҡлыҡ, договор йә иһә ерҙең срокһыҙ файҙаланыуға тапшырылыуы, ғүмерлек мираҫ итеп ҡалдырылыуы тураһындағы акт, хужалыҡ кенәгәһенән өҙөмтә һ.б. булырға тейеш. Хоҡуҡты билдәләгән документты милеккә хоҡуҡты теркәү тураһындағы ғариза менән бергә күп йүнәлешле үҙәк офисына тапшырырға, 350 һумлыҡ дәүләт пошлинаһын түләргә кәрәк.
– Ниндәй йорттар – хоҡуҡ белдереү ҡағыҙы ебәреү тәртибе буйынса, ә ниндәйҙәре “дача амнистияһы” буйынса теркәлә?
– Торлаҡ йорт шәхси торлаҡ төҙөлөшө йәки шәхси ярҙамсы хужалыҡ өсөн бүленгән ерҙә урынлашһа, хоҡуҡ – белдереү ҡағыҙы ебәреү тәртибе буйынса, йорт баҡса участкаһында икән, “дача амнистияһы” буйынса теркәлә.
– Күптән түгел киң мәғлүмәт сараларында “дача амнистияһы”н 2022 йылдың мартына тиклем оҙайтырға тәҡдим итеүҙәре тураһында мәғлүмәт донъя күрҙе...
– Ысынлап та, “дача амнистияһы”н оҙайтыу мөмкинлеге хаҡында хәбәр сыҡҡайны. “Росреестр”ға ла коронавирусҡа бәйле “амнистия”ны оҙайтыуҙы һорап мөрәжәғәт итеүселәр булды. Был турала ҡарар сыҡһа, өҫтәмә рәүештә мотлаҡ белдерербеҙ.
