Кеше яҙмышы эш һөҙөмтәһенә бәйле

Һәр береһе буйынса – 42 пакет документ

Тапшырыуҙа төҙөлөш һәм архитектура министры урынбаҫары Артем Ковшов, Башҡортостанда бөлгөнлөккә төшкән төҙөүселәрҙең өлөшсөләр алдындағы йөкләмә­ләрен көйләү фонды генераль директоры Дамир Миңлебаев ҡат­наш­ты һәм телевизор ҡараусы­ларҙың ошо йорттарҙың яҙмы­шына, төҙөлөш ваҡытына ҡағы­лышлы әһәмиәтле һорауҙарына яуап бирҙе.

Билдәле булыуынса, ошо Фонд­тың Күҙәтеү советы киләһе ултырышында банкрот-төҙөүсе­ләрҙең алты объекты буйынса мәсьәләне ҡараясаҡ. Өфөлә “Интеграл” компа­нияһының – ике, “БашИнвестДом” һәм “ИнвестКапиталСтрой”ҙың берәр йортон төҙөп бөтөргә, ә Стәрлетамаҡтағы “ЕТЗК” йәмғиә­тенең ике йорто буйынса компенсациялар түләргә тәҡдим ителә. Мәғлүм булыуынса, төҙөүселәргә ҡарата дәғүәләр күп, белгестәр уларҙы бик ҡатмарлы объекттар тип белдерҙе. Йорттарҙың нигеҙе һәм төҙөлөш буйынса һорауҙар бихисап.

2020 йылдың аҙағына тиклем Күҙәтеү советына тағы ла алданған 310 өлөшсөһө булған туғыҙ йортҡа бәйле проблемаларҙы ҡарау планлаштырыла. Улар – ”СамоСтрой” йәмғиәтенең ике, “БашСтройКомплект”тың ете йорто.

Дамир Миңлебаев объекттарҙы процедураларға әҙерләүҙең ни өсөн күп ваҡытты алыуын аңлатты: һәр береһе буйынса 42 пакет документ йыйырға кәрәк. Фонд объектты төҙөү буйынса ҡарар ҡабул итһә, суд аша уға төҙөүсе вәкәләт­тәрен тапшырырға кәрәк. Һуңынан подрядсы һайлауға конкурс үткә­релә. Төҙөлөш өс-дүрт айҙан ғына башлана, артабан барыһы ла объект­тың әҙерлек кимәленә бәйле буласаҡ.

Киләһе йылдың беренсе кварталында Нефтекамала алданған өлөшсөләрҙең һуңғы йортон төҙөп бөтөү планлаштырыла. Ҡалалағы башҡа яңы объекттар, эскроу-иҫәпте файҙаланып, яңы финанс системаһы буйынса төҙөлә.

Мәсьәлә хәл ителә

Өфөлә “Кремлевский” торлаҡ комплексын тикшереү тамам­лан­ған. Декабрҙә граждандар фатир ҡабул итеү акттарына ҡул ҡуя баш­лаясаҡ. Төҙөүсене алмаш­тырыуға бәйле бер аҙ тотҡарлыҡ тыуған.

Шулай уҡ “Көмөш шишмә” торлаҡ комплексына бәйле мәсьәлә лә хәл ителә.

Яңы төҙөүсе, биләмәлә яңы йорттар һалырға рөхсәт булһа, “Риверсайд” торлаҡ комплексын төҙөүҙе тамамларға теләй. Әле был мәсьәлә республика Башлығы Радий Хәбировҡа “Төҙөлөш сәғәте”нә ҡарауға индерелгән.

Республиканың Төҙөлөш һәм архитектура министрлығы вәкил­дәре хәбәр итеүенсә, Өфө райо­нындағы “Миловка паркы” торлаҡ комплексы объекттарында төҙөлөш 2021 йылдың яҙында башланасаҡ. Әйткәндәй, ул иң ҙур объект, әле 800 кешенең торлаҡ мәсьәләһе хәл ителә. Өлөшсөләрҙең хоҡуҡ­тарын тергеҙеү буйынса махсус ҡарар бар. 22 йорт төҙөргә ҡарар ителгән. Уның өсөн аҡса бүле­нә­сәге тураһында протоколға ҡул ҡу­йылған. Бынан тыш, күрше торлаҡ комплексында 391 ғаилә фатир алған.

Тапшырыуҙа ҡатнашыусыларға инициатив төркөм вәкиле Виталий Листков ошо эштең ваҡытына бәй­ле һорау бирҙе: “Әлбиттә, беҙ­ҙең мәсьәләне хәл итә башлауҙарынан ҡәнәғәтбеҙ, әммә өлөшсөләрҙең һорауҙары бар. Мәҫәлән, йорттар төҙөлөп бөткәс, улар ниндәй ваҡыт эсендә файҙаланыуға тапшы­рыласаҡ? Ниндәй этаптар ҡарал­ған, өлөшсөләргә нимә эшләргә кәрәк?”

Башҡортостандың бөлгөнлөккә төшкән төҙөүселәрҙең өлөшсөләр алдындағы йөкләмәләрен көйләү фонды генераль директоры Дамир Миңлебаев: “Хәҙер беренсе аҙым – был функцияны төбәк фондына тапшырһындар өсөн, судта тө­ҙөү­сене алмаштырыу буйынса бөтә процедураларҙы үтеү. Быны конкурс идарасыһы менән Фонд белгесе атҡара. Һуңынан тикшереү үткә­реп, проектҡа төҙәтмә инде­рәләр – барыһы ла конкурс ниге­ҙендә һәм законға ярашлы эшләнә. Быға яҡынса өс-дүрт ай ваҡыт үтә. Унан һуң төҙөлөшкә күсәбеҙ. Өлөшсөләр үҙ бурысын башҡарған, уларға тик төҙөлөштөң бөткәнен көтөргә, беҙ күргән сараларҙы контролдә тоторға, эш барышын күҙәтергә генә ҡала”, – тип яуап бирҙе.

Тиҙерәк “хәрәкәт итһен” өсөн

Бер ай элек Өлөшсөләр хоҡуҡ­тарын яҡлау буйынса федераль һәм төбәк фондтары ҡатнашлы­ғында үткән кәңәшмәлә төҙөлөш­тәрҙе тамамлауға, компенсация түләүгә бәйле мәсьәләләр ҡарал­ғайны. Был маҡсаттарҙы тормошҡа ашырыуға сумманың 88 процентын – Федераль фонд, ә 12-һен Төбәк фонды бүләсәк. Башҡортостан төҙөлөш һәм архитектура министры урынбаҫары Артем Ковшов белдереүенсә, был – урындағы властарҙың ваҡытында саралар күреүе, ныҡышмаллыҡ һөҙөмтәһе.

"Фонд беҙҙең үтенескә яуап бирҙе һәм документтар тиҙерәк “хәрәкәт итһен” өсөн урындарҙа белгестәр әҙерләүгә булышлыҡ итте. Беҙ, бүленгән аҡса арҡаһында Мәскәү һәм Ленинград өлкәләренән генә ҡалышып, өсөнсө урынға сыҡтыҡ. Әлегә Башҡортостанда 51 объекттағы 2628 алданған өлөшсөнөң торлаҡ мәсьәләһен хәл итеүгә алты миллиард һум алыуға өлгәштек", – тине Артем Ковшов.

Благовещен ҡалаһында “Яңы йорт” торлаҡ комплексында 2009 йылдан бирле фатир көтәләр. Был объекттың яҙмышы нисек хәл ителер? Ысынлап та, был күптәнге объекттарҙың береһе. Уны торлаҡ төҙөлөшө кооперативы форматында төҙөгәндәр. Төҙөлөш оҙаҡ ваҡытҡа туҡтап торған, һуңғы секцияларын проектһыҙ төҙөгәндәр. Әле ошо йортҡа бәйле документтар туплау эше тамамланған.

Әгәр түләүҙәр тураһында ҡарар ҡабул ителһә, ул саҡта һәр өлөшсө, Федераль фонд сайтына (ДОМ.РФ) инеп, унда ғариза ҡалдыра ала.

“Көмөш шишмә” торлаҡ ком­плек­сы буйынса мәсьәлә лә хәл ителә. Бының өсөн предприятие бан­кротлыҡ процедураһын үтергә тейеш.

25 ноябрҙә Арбитраж судында сираттағы ултырыш була. Бан­кротлыҡ тураһында ҡарар ҡабул ителгәс, өс-дүрт айҙа документтар әҙерләп, Федераль фондҡа ебә­рәсәктәр. Мәғлүм булыуынса, былтыр ике йорт республика көсө ме­нән төҙөлгән, әле тағы ла ике ҙур йорт ҡалған. Республиканың маҡ­саты – судҡа ныҡлап әҙерләнергә һәм конкурс эше процедураһын индерергә.

Был йорттарҙың яҙмышы тура­һында мәғлүмәт “Ватсап” һәм “Бәй­ләнештә” социаль селтәрҙәре аша алданған өлөшсөләргә ебә­реләсәк. Шулай уҡ республиканың Төҙөлөш һәм архитектура министрлығы аша ла мәғлүмәт алырға була.

Йыл аҙағына тиклем “Яңы Булгаков” торлаҡ комплексына ҡағы­лышлы мәсьәләне лә хәл итеү планлаштырыла. Унда 14 йорттоң барыһы ла республика көсө менән төҙөлгән. Төҙөлөштә өлөшләтә ҡат­нашыусыларҙың хоҡуҡтарын яҡлау фонды был эшкә йәлеп ителмәгән. Төҙөлөп бөтмәгән алты фатирлы ике танхаустың 11 өлөшсөһөнә де­кабрҙә компенсация түләү күҙал­лана. Был биҫтәлә йәшәгән халыҡ инфраструктура менән тәьмин ителгән – ике балалар баҡсаһы һәм мәктәп һалынған. Әйткәндәй, быйыл августа Дәүләт Йыйылышы – Ҡоролтай ҙа проблемалы йорттарға компенсация бүлеү тураһында закон ҡабул иткәйне.

Октябрьский ҡалаһындағы “Весна” торлаҡ комплексы ҡасан төҙө­лөп бөтөр, тигән һорау ҙа борсой ха­лыҡты. Министрлыҡ белде­ре­үенсә, объекттың сифаты буйынса һорауҙар бар. Йорт “Госстройнадзор”ҙың талаптарын иҫәпкә алып ҡа­бул ителәсәк. Тағы ла бер мәсь­әлә бар – суд приставтары торлаҡ булмаған биналарға сикләү индер­гән. Киләһе йыл башында фатир хужаларына асҡыс биреү өсөн 18-се йортто әҙерләп тапшырыу планлаштырыла. Төҙөкләндереү эштәре атҡарылған, ваҡ мәсьәләләр генә ҡалған.

Меңәрләгән кешенең яҙмышын хәстәрләп

Башҡортостандың Төҙөлөш һәм архи­тектура министрлығы мәғлү­мәт­тәре буйынса, әле 2945 өлөш­сөгә бәйле 59 объект буйынса һорауҙар ҡаралған. Төбәктә бар­лығы 7578 килешеүе булған 125 проблемалы йорт бар. Уларға ҡағылышлы мәсьәләләр махсус фондтар ярҙамында 2023 йылға тиклем хәл ителергә тейеш, йәғни 4218 граждан өлөшсө булып торған 87 объектты файҙаланыуға тапшырыу планлаштырыла. Шулай уҡ элекке төҙөүселәр йәки инвес­тор­ҙар ярҙамында төҙөлөштө тамамлау (21 объект – 2106 граждан), баш­ҡа юлдарҙы файҙаланып, шул иҫәптән һатып алыу юлы менән (биш объект – 99 граждан) пробле­маны хәл итеү күҙ уңында тотола.

"Меңәрләгән кешенең яҙмышы һеҙҙең эш һөҙөмтәһенә бәйле. Даими аралашырға, әле властар тарафынан ниндәй саралар күрел­гәнен уларға аңлатырға кәрәк", – тине тапшырыуҙы алып барыусы, Башҡортостан Башлығының Социаль коммуникациялар буйынса идаралығы етәксеһе Елена Прочаковская.

Тапшырыуҙа ҡатнашыусылар белдереүенсә, әле өлөшсөләр ме­нән аралашыу күп осраҡта мес­сенд­жерҙар чатында алып барыла, шу­лай уҡ көнүҙәк мәғлүмәттәр Фонд­тың, Төҙөлөш һәм архитектура министрлығының сайтына ҡуйыла.

Алданған өлөшсөләрҙе фатир менән тәьмин итеү республикала ғына түгел, тотош илдә ҡырҡыу көн­үҙәк мәсьәлә булып тора. Баш­ҡортостан Башлығы Радий Хәби­ров баштан уҡ был проблеманың өҫтөнлөклө булыуын билдәләне. Әле башҡарылған эштәр иһә был йүнәлешкә етди иғтибар бирелеүе хаҡында һөйләй.