+20 °С
Болотло
Социаль мәсьәлә
15 Ғинуар 2021, 20:30
Исламдың хыялын кем тормошҡа ашырған?
Акция сайтына Башҡортостандан 500-ҙән ашыу теләк килгән.
Яңы йыл байрамдары артта ҡалды, әммә “Теләктәр шыршыһы” акцияһы дауам итә. Башҡортостандың Йәмәғәт палатаһы аппараты етәксеһе ярҙамында Стәрлетамаҡ ҡалаһында йәшәгән Ислам Ишморатовтың Яңы йыл хыялын тормошҡа ашҡан.
Ислам Ҡыш бабайҙан микроскоп һораған. Бөгөн республиканың Йәмәғәт палатаһы хеҙмәткәрҙәре палата рәйесе Шамил Вәлиев исеменән бүләкте малайға тапшырҙы.
Был иғтибар өсөн малайҙың әсәһе рәхмәт яҙып ебәргән: “Минең улыма бүләк ителгән ҡыуаныс һәм бәхетле минуттар өсөн рәхмәт. Ул бәхетле, көнө буйы нимәлер ҡарарға тип туҡтауһыҙ эҙләнә, беҙҙең беренсе эшебеҙ – уҡ пленкаһы. Ислам оло рәхмәт һәм ҙур сәләм еткерә”.
“Теләктәр шыршыһы” Бөтә Рәсәй акцияһы – етем, аҙ тәьмин ителгән ғаиләләрҙәге балаларҙың һәм ауыр хәлдә булған ололарҙың Яңы йыл хыялдарын тормошҡа ашырыу маҡсатында ойошторола. Рәсәй Президенты Владимир Путин 5 декабрҙә был акцияға старт бирҙе. Башҡортостандан акция сайтына 500-ҙән ашыу теләктәр килгән, тип хәбәр итә Башҡортостан Хөкүмәтенең матбуғат хеҙмәте. Уларҙы 28 февралгә тиклем үтәп бөтәсәктәр.
Фото: БР Йәмәғәт палатаһы
