Йәш быуын сәләмәт булһын

Рәсәй Президенты Владимир Путин­дың май указдарында билдә­ләнгән “Мәғариф” милли проекты бихисап төбәк проекттарын тормошҡа ашырыуға ла юлдар асты. Мәҫәлән, бөгөн Баш­ҡорт­ос­тандың 800-ҙән ашҡан белем усаҡтарында “Юғарыға ос!” проекты сиктәрендә бик матур башланғыстар ғәмәлгә инә.

Башҡортостан Республикаһы Мә­ғариф һәм фән министрлығы мәғлүмәт­тәренә ҡарағанда, 2019-2020 йылда “Юғарыға ос!” республика мәғариф проектының “Сәләмәт йылмайыу” модуле сиктәрендә республикала 61 стоматология кабинеты асылған. Уларҙың барыһы ла бер дизайнер стилендә эшләнгән, заманса ҡорамалдар менән йыһазлан­дырылған һәм лицензияланған.

Балаларының бәләкәй сағы­нан тештәре һау һәм ынйылай матур булыуы – һәр ата-әсәнең уй-теләге. Шуға ла “Сәләмәт йылмайыу” модуле сиктәрендә республикала стоматология каби­неттарының асылыуы хуплауға лайыҡ. Ҡырмыҫҡалы районының Прибельский урта мәктәбендә лә “Сәләмәт йылмайыу” модуле сиктәрендә кабинетта яҡынса 305 мең һумдан ашыуға ремонт эштәре атҡарыл­ған, проект модуле логотибы эшләнгән. Мәктәпкә 708890 һумлыҡ стоматология ҡорамал­дары, ҡулланма материалдары ҡуйылған. Теш табибы Әлиә Ғиз­зәтуллина өсөн эшләү шарттары бында шәп.

Прибельский урта мәктәбе рес­публикалағы башҡа ошондай белем усаҡтарынан нимәһе менән айырыла? “Беҙҙә 690 бала уҡый, 56 уҡытыусы һәм 26 хеҙмәткәр эшләй. Бында “Башҡорт мозаикаһы” тигән бик үҙенсәлекле сара үткәрелә. Уның маҡсаты – башҡорт теле менән бер рәттән, халҡыбыҙҙың, мәҙәниәтебеҙҙең төрлө яҡтарын сағылдырыу. Унда Тыва, Һамар һәм башҡа төбәктәрҙән вәкилдәр ҡатнашты”, – тип һөйләй мәктәп директоры Рита Хисмәтуллина.

Былтыр онлайн форматта үткәрелгән “Башҡорт мозаикаһы” Башҡортостандың халыҡ шағиры Мостай Кәримдең тыуыуына 100 йыл тулыуға арналған.

Тағы шуныһы үҙенсәлекле: Прибельский урта мәктәбенең Бишауыл-Уңғар, Иҫке Шәрәй һәм Мөкәй ауылдарында филиалдары бар. Йәғни ошо ауылдағы ҡыҙҙарға һәм малайҙарға белем бирелә. Бынан тыш, күптән түгел мәктәп уҡыусылары уҡытыусы­лары Ф.М. Байымова һәм З.Т. Хисаметдинова етәксе­легендә Ҡырмыҫҡалы ауылы мәҙәниәт йортонда М. Ғафури исемендәге Башҡорт дәүләт академия драма театры ҡуйған “Салауат тоҡомдары” тигән спектаклде ҡарап ҡайттылар. Шулай итеп, мәктәптә балаларға белем биреүҙән тыш, республикабыҙ тарихына, мәҙәниәтенә лә һөйөү уяталар.