Министр урынбаҫары яуап бирҙе

– Беҙ ҡатыным менән вакцина яһаттыҡ. Миндә антиесемдәрҙең юғары булыуы асыҡланды, ә хәләл ефетемдеке түбән. Антиесемдәр титры кимәле нимәгә ҡарай? Улар кеше организмында нисә ай йәшәй? Прививканан һуң иммунитет нисә айға етә?

– Вирус векторҙары, күҙәнәккә эләгеп, һаҡлаусы антиген – S аҡһымы синтезын тәьмин итә. Организмда ят аҡһым барлыҡҡа килеүенә яуап итеп, тулы ҡиммәтле күҙәнәк иммунитеты формалаша. “ГамКовидВак” (сауҙа маркаһы – “Спутник V”) вакцинаһын ике тапҡыр организмға индереү оҙайлы иммунитет барлыҡҡа килтерергә ярҙам итә. Вектор вакциналарын ҡулланыу тәжрибәһе иммунитеттың ике йылға тиклем һаҡланыуын күрһәтә.

Вакцинациянан һуң барлыҡҡа килгән антиесемдәр кимәле организмдың вакцинаға ҡарата иммун яуабына бәйле. COVID-19 инфекцияһын үткәргәндән һуң антиесемдәр өс-алты ай тирәһе һаҡлана.

– Вакцинаның беренсе компонентын яһатҡандан һуң, температура юғары күтәрелде. Икенсеһен эшләтергә яраймы?

– Температура күтәрелеүе организмдың прививкаға ҡарата реакцияһын күрһәтә, был нормаль күренеш. Ул тәүге өс көндә күҙәтелә. Күп осраҡта прививка кире эҙемтәләрһеҙ үтә. Ҡайһы саҡта тән температураһының күтәрелеүе, баш һәм быуындарҙың ауыртыныуы тамаҡ ҡыжмырҙауы, арыу-талсығыу, тымау тейеүе, тире сабыртыуы ихтимал.

– Вакцина яһатҡандан һуң бөтә иҫкәртеү сараларын үтәү мотлаҡ: битлек кейеү, ҡулдарҙы йыш йыуыу, социаль дистанцияны күҙәтеү, сөнки иммунитет прививканан һуң өс-алты аҙна эсендә генә барлыҡҡа килә, был осорҙа антиесемдәр барлыҡҡа килеүгә ҡарамаҫтан, вирусты йоҡтороуығыҙ бар.

– Прививкаларҙың милли календарын раҫлау тураһындағы бойороҡтағы үҙгәрештәргә ярашлы, медицина, мәғариф, социаль хеҙмәт күрһәтеү ойошмалары һәм күп функциялы үҙәк хеҙмәткәрҙәре мотлаҡ вакцина яһатырға тейеш.

Һаулыҡ һаҡлау министры урынбаҫары республика халҡын битлек режимын һаҡларға, эпидемиология талаптарын үтәргә саҡырҙы.