“Яңы бинала эшләүе лә күңелле!”

Казанка биләмәһе биш ауылды берләштерә. Шуларҙың өсәүһендә фельдшер-акушерлыҡ пункттары эшләп килә. Әммә Казанкалағы медицина хеҙмәте күрһәтеү пункты уңайлыҡтары булмаған, бөгөнгө талаптарға яуап бирмәгән бинала урынлашҡан була. Был мәсьәлә буйынса ауыл халҡы бер нисә тапҡыр етәкселеккә мөрәжәғәт итә, әммә финанс ҡыҫынҡылығы арҡаһында проблеманы хәл итеү кисектерелеп килә.

Һәм бына, ниһайәт, казанкалар өр-яңы ФАП-лы булды! Бының өсөн улар республика етәкселегенә ҙур рәхмәт әй­тә, сөнки тап “Беренсел медицина-санитар ярҙамы күрһәтеү селтәрен яңыр­тыу” ише төбәк прог­раммаларының булдырылыуы ауыл ерендә йәшәүселәрҙең сәләмәтлеген нығытыуға, бының өсөн шарттар булдырыуға яңы мөмкинлектәр асты.

Казанкалағы ФАП бик ҡыҫҡа ваҡытта – ике ай эсендә төҙөлгән. Мөдир Любовь Ермолаева – 34 йыл ғүмерен һаулыҡ һағына бағышлаған тәжрибәле хеҙмәт­кәр. 1987 йылда Стәрлетамаҡ медицина училищеһын тамамлаған ҡыҙ ошо ауылда хеҙмәт юлын башлай. Тейешле шарттар булдырылған, дөйөм майҙаны 100 квадрат метрҙан ашыу тәшкил иткән өр-яңы ФАП өсөн ҡыуанып бөтә алмай ул. “Йылы, яҡты, бөтә уңайлыҡ­тары булған бинала эшләүе лә кү­ңелле. Заманса ҡорамалдар халыҡҡа сифатлы медицина ярҙамы күрһә­тергә мөмкинлек бирә”, – ти Любовь Ермолаева.

Яңы ФАП-та күсмә бригада составында район үҙәк дауаханаһы табиптары, тар йүнәлештәге белгестәр ауы­рыуҙарҙы ҡабул итеү ойоштора аласаҡ. Бының өсөн бөтә шарттар булдырылған.

Казанкаларҙың күршеләре – Таштүбә ауылы халҡы ла ошондай уҡ шатлыҡлы ваҡиға кисерҙе. Бын­дағы ФАП та ярайһы уҡ иҫкергән була. Яңы социаль объект ике ауылдағы 300-гә яҡын кешегә медицина ярҙамы күрһәтеү менән шөғөлләнә.

Ғөмүмән, һуңғы йылдарҙа район етәкселеге социаль өлкәне үҫтереү, халыҡтың йәшәү кимәлен яҡшыртыу, уңайлыҡтар булдырыу йәһәтенән маҡ­сатлы эштәрҙе бермә-бер әүҙем­ләштергән. Әлшәйҙәр “Урындағы баш­лан­ғыстарға булышлыҡ итеү”, “Башҡорт ихаталары” программаларында, “Айыҡ ауыл” кеүек республика конкурстарында ла әүҙем ҡатнаша. Район хакимиәте башлығы Дамир Радик улы Мостафин ауыл тормошона ҡағылышлы социаль мәсьәлә­ләрҙең һәр ваҡыт хакимиәттең иғтибар үҙәгендә булыуын, был йәһәттән республика етәкселегенең даими хәстәрен тойоп эшләүҙәрен билдәләне.

Беренсел медицина ярҙамы күр­һәтеү объекттарын яңыртыу йәһә­тенән дә эштәр дауам итә: быйыл Ҡармыш, Сураҡай, Торонтайыш ауылдарында фельдшер-акушерлыҡ пункттары төҙөү күҙаллана. Әле файҙаланыуға тапшы­рылған ике ФАП-ты Әлшәй районында киң билдәле, төҙөлөш тармағында ышаныслы ойошма булараҡ танылған Марат Абдуллиндың төҙөлөш фир­маһы сафҡа индергән.

Кеше ҡайҙа ғына йәшәмәһен – бәләкәй ауылдамы, ҙур ҡалаламы – заманса уңайлыҡтарға, яҡшы көн­күреш шарттарына эйә булырға тейеш. Республика етәкселеге лә ошоно үҙ эшмә­кәрлегендә төп маҡсат итеп билдәләй. Ауылдарҙа яңы ФАП-тар асылыуы, медицина ярҙамы күрһәтеү өсөн мөм­кинлектәрҙең артыуы – барыһы ла халыҡтың сә­ләмәтлеген нығытыу, ғүмер оҙай­лылығын арттырыу йәһәтенән кү­рел­гән хәстәрлектең бер сағылышы ул.