Изгелектең юҡтыр сиктәре

Уның төп бурысы – олоғайыу йәки ауырыу сәбәпле өлөшләтә йә иһә тулыһынса үҙ-үҙен хеҙмәт­ләндерә алмаған граждандарға социаль-көнкүреш, табипҡа тиклемге медицина ярҙамы күрһәтеү. Социаль хеҙмәткәрҙәрҙең бурысы ярҙам күрһәтеү менән генә сикләнеп ҡалмай, ә тормошта ауыр хәлдә­геләргә яҡшы мөнәсәбәттә булыуҙы, күңел һалып эшләүҙе лә талап итә. Һәр кем бындай көсөргәнешле хеҙмәтте башҡара алмай, шуға күрә үҙенең кисерештәрен тота алған, тәрән аҡыллы, мәрхәмәтле, изге күңелле, мөләйем кешеләр генә был хеҙмәттә эшләй.

Бигерәк тә коронавирус панде­мияһы ваҡытында социаль хеҙмәт­кәрҙәр аҡ халатлылар менән бер рәттән алғы һыҙыҡҡа баҫҡан һәм ололарға бар яҡлап ярҙам күр­һәткән.

Бөгөн дә был эш дауам итә. Һәр ауылдың социаль хеҙмәт­кәре, ирекмәндәр менән бергә оло йәштәгеләрҙең йортона барып, уларға бар яҡлап ярҙам ҡулы һуҙа. Кәрәк икән, һыуын да килтерә, иҙәнен дә йыуа, ҡарын да көрәй, дарыуҙар, көндәлек кәрәк-яраҡ, аҙыҡ-түлек менән дә ярҙам итә.

– Районда 11 мең 500 пенсионер йәшәй, йыл һайын 200-гә яҡын кеше инвалидлыҡ буйынса ҡағыҙ тултыра. Улар алдында ҙур һорау барлыҡҡа килә, ҡайҙан инвалидлыҡ коляска­һын алырға йә иһә реабилитация өсөн башҡа әйберҙәрҙе нисек һатып алырға? Улар арзан түгел, етмәһә, районда табыу мөмкинлеге лә бик аҙ.

Уларҙы Социаль страховка фонды аша алыу мөмкинлеге бар-барлығын, әммә уның өсөн айҙар, хатта йылдар үтеүе лә мөмкин. Ә сирле кешегә көнөндә кәрәк. Был йүнәлештәге проектты оҙаҡ әҙерләнек, уны уңышлы яҡлап сыҡтыҡ һәм еңеү яуланыҡ. Бик шатбыҙ. Проект аҡсаһына сирлеләр өсөн иң кәрәкле әйберҙәрҙе алырға тырыштыҡ. Инвалид коляскалары, атлар өсөн ике тәгәрмәсле ходун­киҙар, түшәктә ятыусыларға махсус тәғәйен матрастар, туалет-коляска, атлау таяҡтары – барыһы ла бар. Беҙҙең ярҙам сирлегә мөмкин тиклем файҙа килтерһен һәм дауаланып сығырға бер аҙым, ышаныс һәм өмөт уятһын, тигән теләктәбеҙ, – ти ойошма етәксеһе Рәйлә Ғүмәрова.

Был хеҙмәттән файҙаланыу­сылар кәрәкле техник әйберҙәрҙе бушлай алты ай дауамында ҡуллана ала. Тағы ла кәрәк булһа, килешеүҙе оҙайтыу ғына талап ителә. Район халҡынан мөрәжәғәт итеүселәр һаны көндән-көн күбәйә һәм өр-яңы техник әйберҙәр тулған бүлмә бушай бара, ти бында эшләүсе хеҙмәт­кәрҙәр ҙә.

Изгелектең юҡтыр сиктәре, ти­гәндәй, мохтаждарға күрһәткән изгелек һәм мәрхәмәтлелек “Ярҙам” (Изгелек эшлә) халыҡты социаль тәьмин итеү үҙәге ойошмаһы хеҙмәткәрҙәренә йөҙләтә кире әйләнеп ҡайтһын. Уларҙың ауыр, әммә сауаплы эштәрендә уңыштар теләйбеҙ.