“Үҙгәрештәр бар тип ишеттек...”

“Күптән түгел генә икенсе бәпесебеҙ тыуҙы. Ошо сәбәпле, бәхет-шатлығыбыҙҙың сиге юҡ! Өҫтәүенә, әсәлек капиталы аласаҡбыҙ. Тик бына уға бәйле үҙгәрештәр бар, тип ишеткәйнек. Ошо хаҡта яҙмаҫһығыҙмы икән?

 ЗЫЯЕТДИНОВТАР ғаиләһе”.

 – Заман башҡа – заң башҡа, тигәндәй, һәр яңы көн тормошобоҙға ниндәй ҙә булһа яңылыҡ индерә. Улар ҡануниәт өлкәһен дә урап үтмәй. Ысынлап та, әсәлек капиталын алыуға  бәйле үҙгәрештәр көсөнә инде. Рәсәй Хеҙмәт һәм социаль яҡлау министрлығының был хаҡтағы фарманы хоҡуҡи мәғлүмәттәр тураһындағы рәсми интернет-порталда баҫылды.

Әгәр быға тиклем ҡатын әсәлек капиталы аҡсаһын пенсияһының йыйыла торған өлөшөнә күсерһә, ул был аҡсаны дәүләткә ҡарамаған пенсия фондтарынан кире ҡайтарта һәм башҡа йүнәлеш буйынса файҙалана ала.

Яңы ҡағиҙәләргә ярашлы, пенсия фондына аҡсаны кире ҡайтарғандан һуң, ярты йыл эсендә сумма менән нимә эшләйәсәгегеҙ хаҡында ҡарар ҡабул итергә һәм ғариза яҙырға кәрәк. Алты ай үткәндән һуң Пенсия фондына йәнә мөрәжәғәт итергә һәм аҡса пенсия йыйымына китмәҫ элек срокты оҙайтыуҙы һорау зарур.

Хәтерегеҙгә төшөрәбеҙ, 2021 йылда әсәлек капиталы аҡсаһы 483882 һум тәшкил итә. Икенсе бала тыуғанда был сумма 155550 һумға арта. Ике балаға дөйөм сумма – 639432 һум.

Айһылыу НИЗАМОВА әҙерләне.