Яңы мөмкинлектәр – киләсәк өсөн

Яҡынса ике йыл элек коронавирус инфекцияһы хаҡында бер нәмә лә белмәй инек,  ишеткәнебеҙ ҙә булманы.           “Covid-19” донъялағы һәр илдең һаулыҡ һаҡлау тармағын ҙур һынау алдына ҡуйҙы, ғөмүмән, тормошобоҙҙо тотошлай үҙгәртте.

Шулай итеп, коронавирус пандемияһы республикабыҙ, шул иҫәптән Стәрлебаш үҙәк район дауаханаһы өсөн көтөлмәгән хәлгә әйләнде. Шуныһы мәғлүм: был инфекцияға ҡаршы көрәштә заманса ҡорамалдарҙың булыуы яҡшы. “Хәҙер пленкаларҙы эшләү, аппаратты ҡулдан көйләү кәрәкмәй. Һанлы аппараттағы бер төймәне баҫып ҡына сифатлы һүрәтте сығарырға мөмкин”, – тип һөйләй яңы рентген аппараты хаҡында Стәрлебаш үҙәк район дауаханаһы рентген-лаборанты Люциә Ибәтул­лина. Өс тиҫтә йылға яҡын эш стажы булған хеҙмәткәр өсөн яңы кабинеттың уңайлы, киң, яҡшы һәм  заманса ремонт эшләнеүе, әлбиттә, ҡыуаныслы. Өҫтәүенә, был па­циент­тарға ла ҡулайлы.

Икенсе яңы аппарат – һанлы флюорограф – Сулпан Дәминева ҡарамағында. Был ике заманса аппарат медицина ярҙамын күрһәтеү сифатын яҡшырта: район дауаха­наһы табиптары юғары сифатлы рентген һүрәттәргә эйә булырға, оператив рәүештә диагноз ҡуйырға һәм, ғөмүмән, пациенттарҙы дауа­лауҙа ярҙам итә. Әйткәндәй, яңы медицина ҡорамалдары булған рентген һәм флюорография кабинеттары Стәрлебаш үҙәк район дауаханаһында капиталь ремонт эштәренән һуң барлыҡҡа килгән. Ә быларҙың барыһы иһә “Һаулыҡ һаҡлау” милли проекты ярҙамында мөмкин булған. “Был – табиптар, дауахана һәм тотош район халҡы өсөн көтөп алынған ваҡиға”, – тип белдерҙе Стәрлебаш үҙәк район дауаханаһы баш табибы Фидаил Хәбибуллин.

Шулай итеп, быйыл августан Стәрлебаш үҙәк район дауаха­наһында районда йәшәгән бихисап кеше медицина тикшереүе үткән. Яңы ҡорамалдарҙың техник мөм­кинлектәре ярҙамында дауаханала рентген һүрәттәренең электрон базаһы булдырылған. Өҫтәүенә, рентген комплексы пациенттар сәләмәтлеге өсөн күпкә хәүеф­һеҙерәк: нурланыу ихтималлығы күпкә аҙыраҡ.

Стәрлебаш үҙәк район дауа­ханаһының кадрҙар менән тәьмин ителеүенә килгәндә, уларҙы медицина ойошмаһында эшләүгә йәлеп итеү өсөн йыл һайын район хакимиәте етәкселеге, үҙәк район дауаханаһы вәкилдәре һәм студенттар араһында осрашыуҙар уҙғарыла. Йәй көндәрендә буласаҡ табиптарға тәжрибә туплау мөм­кинлеге бирелә. Медицина ойош­маһының дәртләндереү түләүҙәре тураһындағы ҡарарына ярашлы, йәш белгестәр һәм квалификация категориялары булған белгестәр өсөн өҫтәмә түләүҙәр ҡаралған. Ошондай уҡ аҡсалата ярҙам  һау­лыҡ һаҡлау өлкәһендә туҡтауһыҙ стажы булғандар өсөн дә тәғә­йенләнә. Бынан тыш, ойошма етәк­селеге тарафынан эшкә урын­лашҡан табиптарға фатирҙы ҡур­тымға алғанда шулай уҡ ай һайын аҡсалата ярҙам күрһәтелә. Район етәкселеге тарафынан торлаҡ төҙөлөшө өсөн бушлай ер участкалары бирелә, үҙәк район дауаха­наһы хеҙмәткәрҙәренең балаларын балалар баҡсаһына йәки мәктәпкә урынлаштырырға ярҙам күрһәтелә. Ауыр хеҙмәт көнөнән һуң йәш белгестәрҙең ялын файҙалы ойоштороу өсөн район етәкселеге йыл буйына бушлай киносеанс­тарға, бассейнға, күнекмә залдарына йөрөргә абонементтар бүләк иткән.  Әйткәндәй, әле дауаханаға эндокринолог һәм офтальмолог талап ителә. Шуға теләге булғандар Стәрлебаш үҙәк район дауаха­наһына эшкә килә ала.

Айһылыу НИЗАМОВА.