Киләсәккә ҙур өмөт менән...

Коронавирус ҡасан да булһа сигенер, көсһөҙләнер, халыҡтың сәләмәтлеген һаҡлау буйынса яңы бурыстар һәм мөһим эштәр генә кәмемәйәсәк әле. Республикабыҙҙың һаулыҡ һаҡлау тармағы алдында торған тәү сираттағы мәсьәләләргә иғтибарҙы йүнәлтеп, тормошҡа ашырылған һәм киләсәккә планлаштырылған мөһим эштәрҙе бергәләп барлайыҡ.

 2023 йылдан һуң Өфөнөң Дим биҫтә­һендә яңы ҡала балалар дауаханаһын, Затон биҫтәһендә Республика йоғошло сирҙәр дауаханаһының икенсе сиратын һәм Һуғыш ветерандары госпитален төҙөү планлаштырыла. Баш ҡаланың үҫеше, айырыуса көньяҡ-көнбайыш йүнәлештәге биләмәләрҙә халыҡтың артыуы яңы балалар дауаханаһы төҙөү кәрәклегенә ишаралай. 17-се ҡала балалар дауаха­наһының кескәй пациент­тарҙы ҡабул итеү мөмкинлеге сикләнгән. Яңыһы күп профилле буласаҡ, хирургия, терапия бүлексәләре эшләйәсәк.

Өфөнөң Запотоцкий урамындағы Республика йоғошло ауырыуҙар дауаханаһы яңыртыуға, киңәйтеүгә мохтаж, иҫке һәм тар, ҡыҫынҡы биналар заман талаптарына яуап бирмәй, әле яңы корпустар төҙөү өсөн майҙандар өйрәнелә, тип белдерҙе һаулыҡ һаҡлау министрының беренсе урынбаҫары Азат Рәхмәтуллин. Шулай уҡ 2023 йылдан һуң Стәрлетамаҡ, Нефтекама ҡалаларында, республи­каның төньяҡ-көнсығышында яңы дауахана корпустары ҡалҡып сығасаҡ.

Быйыл республикала 12 капиталь медицина объекты, шул иҫәптән ике табип­лыҡ амбулаторияһы һәм һигеҙ фельдшер-акушерлыҡ пункты файҙаланыуға тапшырыласаҡ. Киләһе йылға ла өмөттәр ҙур, Өфөлә 9-сы ҡала дауаханаһы, Бай­маҡ­та балалар поликлиникаһы эш баш­лаясаҡ, 44 модулле ФАП монтаж­ланасаҡ. Бынан тыш, Сибай һәм Туймазы ҡала­ларында модулле конструкцияларҙан яңы йоғошло ауырыуҙар госпитале төҙөләсәк.

2023 йылға алты һаулыҡ һаҡлау объектын файҙаланыуға тапшырыу ҡарала. Мәсәғүттә балалар поликлиникаһы, Оло Ыҡтамаҡта дауахана, Ғ. Ҡыуатов исемен­дәге республика дауаханаһы эргәһендә яңы поликлиника, Учалыла хирургия корпусы төҙөлөргә тейеш. Шулай уҡ Кардиология үҙәген үҙгәртеп ҡороу тамамла­насаҡ. Дөйөм алғанда, 2020 йылға һәм 2021–2022 йылдарға иҫәпләнгән республика адреслы инвестиция программа­һына ярашлы, 3,4 миллиард һумға 29 һаулыҡ һаҡлау объектын проектлау, төҙөү һәм үҙгәртеп ҡороу планлаштырыла.

Ноябрь айында “Транспорт аҙна­һы”нда республикаға медицина модулле икенсе “АНСАТ” вертолеты тапшырылды. Рәсәй Һаулыҡ һаҡлау министрлығы менән 2022 йылда санитар авиация осоштарын финанслау тураһында килешеү төҙөләсәк.

“Һаулыҡ һаҡлау” милли проектына ярашлы, 2019 – 2020 йылдарҙа республикала 139 яңы фельдшер-акушерлыҡ пункты, дүрт табиплыҡ амбулаторияһы ҡалҡып сыҡты, 28 күсмә медицина комп­лексы алынды. Ауылдарға эшкә килгән медицина хеҙмәткәрҙәрен матди дәртләндереү саралары күрелә. Быйыл 705 кешене маҡсатлы уҡытыуға килешеүҙәр төҙөлгән. “Ауыл табибы” программаһы буйынса 38 фельдшер – 500-әр мең һум, тар белгеслеккә эйә 42 табип берәр миллион һум аҡса алды. 

Гүзәлиә БАЛТАБАЕВА