Коронавирус үтеп инә алманы

Беҙ, Баймаҡ районының Түбә социаль үҙәгендә йәшәүселәр, карантинға өйрәнгәнбеҙ. Йыл да киҙеү кеүек йоғошло сирҙәр миҙгеле башланыу менән, бинабыҙ ябылып тора. Киҫкен респиратор сирҙәрҙең таралыуына ҡарап, карантин иғлан ителә.

Ике йыл элек Ҡытайҙың Ухань ҡалаһында коронавирус башланыуын тәүҙә телевизорҙан ғына күҙәт­тек. Тиҙҙән был ҡурҡыныс ауырыу беҙгә, Башҡортостанға ла, килеп етте, шуға күрә 2020 йылдың 17 апрелендә социаль үҙәк тулыһынса карантинға ябылды.

Тәүге осорҙа беҙҙәге эш бер нисә аҙналыҡ вахта ысулы менән ойошторолдо. Хужалыҡ эштәре буйынса яуаплы Нурзиә Утарбаева, шәфҡәт туташтары Дилә Байегетова, Алина Таһирова, санитаркалар Мәзүнә Ишниязова, Валентина Кашкина, Айһы­лыу Әхмәтова, Эльвира Баҡыева, ашнаҡсы Гөлназ Боҫҡонова, уның ярҙамсыһы Рәүилә Аслаева, вахтерҙар Исмәғил Әхмәтов, Илдар Аслаев беҙҙең менән бергә йәшәп, ябыҡ режимда эшләне.

Тәүге көндән беҙҙең хәл-торошто, сәләмәтлекте ныҡлы кон­тролгә алдылар. Тән темпе­рату­раһы даими тикшерелә, бөтә бүлмәләр ҙә дезинфекциялана. Беренсе төркөм ҡайтып киткәс, алмашҡа шәфҡәт туташтары Нәзилә Хөсәйенова, Ғәзимә Яруллина, санитаркалар Розалиә Әхмәтова, Гөлсәсәк Йәнтүрина, Альбина Байышева, Регина Яхина, вахтер Әхтәр Мәмбәтҡолов, оператор Рушан Йосопов, ашнаҡ­сы Фәниә Мәҡсүтова, ярҙамсы Гөлнәзирә Таһирова килде. Уларҙы алмаш­тырған өсөнсө төркөмдә шәфҡәт туташы Дилә Байегетова, Сәлимә Рәхимова, хужабикә Нурзиә Утарбаева, санитаркалар Миңһылыу Ғәйнул­лина, Венера Мусина, Альбина Баянова, Нәсимә Маннапова, вахтер Исмәғил Әхмәтов булды.

Ошо төркөмдәр алмашлап йыл әйләнәһенә шул режимда эшләне. Ә бит күптәренең ғаилә­һе, мәктәп йәшендәге балалары, мал-тыуары бар. Был йәһәттән кемгә – туған­дары, кемгә күршеләре ярҙам иткән икән.

Беҙ тышҡы донъя менән бәйлә­неште башлыса бына ошо үҙе­беҙҙә эшләгән хеҙмәткәрҙәр аша тоттоҡ. Донъя хәлдәрен телеви­зорҙан ҡарап, гәзиттәрҙән уҡып, күҙәтеп барабыҙ. Илебеҙ­ҙең ҡайһы бер ҡарттар йорттарына коронавирус инфекция­һының үтеп инеүен дә яҡшы бе­лә­беҙ. Был яҡтан беҙ әлегәсә имен­лектә йәшәй­беҙ. Быға беҙҙе ҡараған, хәстәрләгән Түбә ҡарттар йорто хеҙмәткәр­ҙәренең ҙур тырышлығы һалынған. Табиптар Ринат Сәйфул­лин, Илгиз Яҡшыбаевҡа, шәфҡәт туташтарына, шулай уҡ барлыҡ кәрәк-яраҡты пак тотҡан кер йыуыусы Райхана Искәнйәроваға ҙур рәхмәт. Вахтер егеттәр карантиндың теүәл үтәлешен тәьмин итә.

Беҙ әле лә һаҡланыу сараларын теүәл үтәп йәшәйбеҙ, һәр ерҙә битлек ке­йеп йөрөйбөҙ, сөнки корона­ви­рус­ҡа ҡаршы көрәш әле лә дауам итә.

Әбделәхәт БИКБУЛАТОВ.

Баймаҡ районы,

Түбә ауылы.