Нуғайбәктәргә – күптән көтөлгән бүләк

Баҡалы районында өр-яңы фельдшер-акушерлыҡ пункты үҙ ишектәрен асҡан.

Һүҙ Нуғайбәк хаҡында бара. Ул – райондағы иң төпкөл ауылдарҙың береһе. Район үҙәгендәге дауаханаға, табиптарға барыу өсөн 50 километр самаһы юл үтергә кәрәк. Бығаса медицина пункты урын­лашҡан бина авария хәлендә булған.

Яңы модулле фельдшер-акушерлыҡ пунктын ил Президенты Владимир Путин­дың май указдары тарафынан раҫланған “Һаулыҡ һаҡлау” милли проекты нигеҙендә төҙөгәндәр. Нуғайбәктәге медицина учреждениеһы – быйыл районда сафҡа индерелгән ошондай өс ФАП-тың береһе.

– Элекке бинала һалҡын һәм шыҡһыҙ ине. Бында иһә барыһы ла заманға ярашлы итеп төҙөлгән, йыһаздар өр-яңы, яҡты, йылы, – ти ауыл фельдшеры Елена Мищерякова.

Гүзәлиә БАЛТАБАЕВА