Бөтә яңылыҡтар
Социаль мәсьәлә
15 Апрель 2022, 09:06

Яңы дарыуханалар ишектәрен аса

Халыҡты хеҙмәтләндереү сифаты яҡшыра.

БРҺаулыҡ һаҡлау министрлығынан.
Фото:БРҺаулыҡ һаҡлау министрлығынан.

Республикала һаулыҡ һаҡлауҙы үҫтереү буйынса дәүләт программаһының үтәлеше, халыҡҡа медицина хеҙмәттәренән файҙаланыу мөмкинлеген арттырыу мәсьәләләре көн үҙәгенән төшкәне юҡ. Бөгөн, һәр яҡлап санкциялар баҫымы аҫтында ҡалған ҡатмарлы осорҙа, дарыуҙарға ихтыяж бермә-бер артҡан мәлдә дарыухана һәм дауалау учреждениелары эшен йәһәтерәк яраҡлаштырып ҡороу мөһим. Төп маҡсат – йәшәү өсөн мөһим дарыуҙар резервын булдырыу.

Шул йәһәттән Межгорье ҡалаһы халҡының һөйөнөсөн уртаҡлаш­маҡ­сыбыҙ. Ҡалала асылған яңы дәүләт дарыуханаһы тәүге һатып алыусыларын ҡаршы алды. Халыҡ фармацевтика учреждениеһының уңайлы урында урынлашҡанын, машиналар өсөн туҡталҡа булға­нын, тауар төрҙәренең күплеген, иң мөһиме, дарыуҙарҙы ял көндә­рендә лә, кискеһен дә һатып алыу мөмкинлеген юғары баһаланы.

“Башфармация” предприятиеһы әүҙем үҫешә, яңы дарыуханалар асыла, клиенттарҙы хеҙмәтлән­дереү сифаты яҡшыра. Уның төп бурысы – республика халҡының дарыуҙарға ихтыяжын ҡәнәғәт­ләндереү, һатып алыу мөмкинлеген арттырыу. Яҡын арала республи­кабыҙҙа тағы ла яңы дарыуханалар асылыуы көтөлә.

– Оҙаҡламай “Өфө” халыҡ-ара аэропортының эске авиалиниялары терминалында, Нуриман райо­нының Павловка ауылында дарыу­ханалар эшләй башлаясаҡ, – тип һөйөнөсө менән уртаҡлашты “Башфармация” предприятиеһының генераль директоры Әлфиә Рәхмәтуллина.

“Былтыр льготалы дарыуҙар ме­нән тәьмин итеүгә төбәк бюдже­ты­нан дүрт миллиард һум йү­нәл­телде, ә федераль үҙәктән – 1,78 миллиард һум. Быйыл да ошо финанс күләме һаҡланды”, – тип бил­дәләп үткәйне Хөкүмәт Премьер-ми­нис­тры Андрей Назаров си­раттағы ул­тырыштарҙың береһен­дә. “Һау­лыҡ һаҡлауҙы үҫтереү” дәүләт про­граммаһына ярашлы, быйыл 1,5 миллиард һумлыҡ ике мең данаға яҡын  медицина ҡора­малы алынған. Уларҙы ремонтлау, сервис хеҙ­мәт­ләндереүе мәсьә­ләләрен хәл итеү иҫәпкә алынған. Санкциялар баҫы­мына ҡарамай, күпселек фармацевтика тауарҙары етештереү­селәренең Рәсәйҙә эшен да­уам итеүе, етештереү һәм кил­те­реү күләменең, шул иҫәптән сит ил препараттарының былтыр­ғы ки­мәлдән юғарыраҡ булыуы билдәле.

Март айында Рәсәйҙә сит ил да­рыуҙарының баҙарға сығыу шарт­тарын ябайлаштырыу һәм улар­ҙы оригиналь ҡаптарҙа һатыу­ға сығарыуға рөхсәт биреү тәҡдим ителде. Был сара дарыуҙарға ҡыт­лыҡ тыуғанда тормошҡа ашыры­ла­саҡ. Бындай “йомшартыуҙар” Рә­сәй биләмәһендә теркәлгән да­рыуҙарға ғына ҡағыла, ҡаптарға пре­парат тураһында рус телендә мә­ғлүмәт булған стикер йә­бештерелә.

 Дарыуҙар менән тәьмин итеү­ҙә­ге тағы бер яңылыҡ: Башҡорт­ос­танға ике сит ил препараты – “Мол­нупиравир” һәм “Эвушелд” кил­терелде. Улар коронавирус ин­фек­цияһын иҫкәртеү өсөн ҡулла­ныласаҡ. Һаулыҡ һаҡлау министры урынбаҫары Ирина Кононова әйт­кәнсә, “Молнупиравир” стацио­нар­ҙа, шулай уҡ амбулатор шарт­тарҙа коронавирусты дауалау өсөн фай­ҙаланыла. Ул “Фавипиравир”ға ҡа­рағанда көсһөҙөрәк, әммә еңелерәк үткәрелә. “Эвушелд” препаратын республика ике мең ҡап итеп алды, ул вакцина яһатыуға ниндәйҙер ҡаршылыҡ булған осраҡта, хроник сирле, иммунитеты ҡаҡшаған ке­шеләргә тәғәйенләнгән. Улар иҫә­бенә онкология, ВИЧ-инфекция, рев­матизм, аутоиммун, ба­уыр сир­ҙәре инә. Препаратты профилле та­биптар – онкологтар, ревматологтар, гемодиализ үҙәктәре бел­гестәре тәғәйенләй ала. Был препараттар рецепт буйынса түгел, төп сирҙе дауалау урынында пациенттарға биреләсәк. Әле исемлек әҙерләнә.

“Һаулыҡ һаҡлау” милли про­ек­ты­ның был өлкәнең тәүге звено­һын яңыртыу программаһы маҡ­са­ты, бер ниндәй баҫымға ҡа­ра­маҫтан, үҙгәрешһеҙ ҡала – сифатлы һәм һәр кем файҙалана алырлыҡ медицина ярҙамы күрһә­теү, шул иҫәптән төпкөлдә, бәләкәй ауыл-ҡасабаларҙа йәшәгән халыҡ өсөн.

 

Д. ҒӘБДРӘХИМОВА.

Читайте нас в