Биш балаһы ла балдай татлы...

Башҡортостандың Йәмәғәт палатаһы “Атайҙар ҡаһарманлығы” конкурсына заявкалар ҡабул итә. Бөгөн шул маҡтаулы атайҙарҙың береһе — Ринат Зөфәр улы Аяҙғолов  менән таныштырабыҙ.

Талбазы ауылында күп балалы ғаиләлә тыуып үҫкән егет урта мәктәпте тамамлағас, Башҡортостан кооперация техникумына уҡырға инә. Хеҙмәт юлын Ауырғазы районы ҡулланыусылар йәмғиәтендә ревизор булып  башлай. Ошонда уҡ  буласаҡ тормош юлдашы Эльмира Рәшит ҡыҙын осрата. Хәҙерге көндә ғаилә ауылда биш балаһы менән йәшәй. Эльмира Наконечнаяның тәүге никахтан донъяға килгән ике балаһын да атай үҙенеке кеүек тәрбиәләй.

Настя Талбазылағы лицейҙы тамамлағандан һуң Стәрлетамаҡтағы күп профилле профессиональ колледжда уҡый. Олимпиадаларҙа ҡатнашып, приздарға, дипломдарға лайыҡ була.   Былтыр ул М.Аҡмулла исемендәге Башҡортостан дәүләт педагогия университетына ситтән тороп  уҡырға ингән.  Әле Өфөләге 4-се балалар баҡсаһында эшләй.  Ҡустыһы Семен Талбазыла лицейҙа уҡый, спорт менән шөғөлләнә. Гагарин исемендәге кубокка мәктәп уҡыусылары араһында үткәрелгән республика олимпиадаһының муниципаль этабында  физкультура буйынса беренсе урынды ала, һигеҙ дипломға һәм дүрт значокка эйә була. ГТО-ның алтын значогына лайыҡ.

Эльмира Рәшит ҡыҙы “Әсәлек даны” миҙалы менән 2018 йылда наградлана. Ринат Зөфәр улы менән өс балаға ғүмер бирәләр. Ҡыҙҙары Светлана Даун синдромы менән донъяға килә. Был хаҡта йөклөлөк осоронда билдәле булыуына ҡарамаҫтан, ата-әсә ҡыҙҙарын үҙҙәре тәрбиәләйәсәктәре тураһында белдерә.

Хәҙер  Светлана 4-се класта өй шарттарында уҡый. Ижад менән шөғөлләнә, һүрәт төшөрөргә әүәҫ. “Үҙеңдең донъяңды һүрәткә төшөр” республика балалар ижад конкурсында ҡатнашып диплом ала, Бөтә Рәсәй инвалидтар ойошмаһының республика бүлексәһе сертификатына лайыҡ була, лицейҙа ойошторолған конкурстарҙа ҡатнаша.

Ҡыҙҙары Лина Талбазы лицейында 3-сө класта уҡый.  Инглиз теле түңәрәгенә йөрөй.  Данил улдарына ДЦП диагнозы ҡуйылған. Уны өйҙә  тәрбиәләү өсөн әсәһе 2018 йылда эштән китергә мәжбүр була.

Ринат Зөфәр улы өмөтһөҙлөккә бирелеп, ҡул ҡаушырып ултыра торғандарҙан түгел. Атай һәр балаһын яратып, йәмғиәттә лайыҡлы урын табыуҙары, яҡшы шарттарҙа йәшәүҙәре өсөн бөтә уңайлыҡтарҙы булдырырға тырыша.

 Маҡтау һүҙҙәренә, наградаларға лайыҡ булырҙай атайҙар эргәбеҙҙә етерлек. Әйҙәгеҙ, уларҙы башҡаларға өлгө итеп күрһәтәйек. Заякаларҙы 1 июлгә тиклем  [email protected] электрон почтаһына ебәрегеҙ.

Фото:шәхси архивтан.