Белгестәрҙе эшкә көтәләр

Раевка үҙәк район дауаханаһына “Һаулыҡ һаҡлау” милли проектының “Беренсел медицина ярҙамын яңыртыу” программаһы буйынса яңы медицина техникаһы – рентген, маммограф, флюорограф килтерелгән. Август аҙағынан яңы ҡорамалдар менән йыһазландырылған кабинеттарҙа пациенттар ҡабул ителә.

Яңы рентген аппаратында эш яйлыраҡ, уңайлыраҡ, ти белгестәр.

Хәҙер Әлшәй районы ҡатын-ҡыҙҙары маммографияны урындағы поликлиникала үтә ала. Быға тиклем улар Стәрлетамаҡ, Дәүләкән ҡалаларына йөрөгән йә “Сәләмәт республика” күсмә поезын көткән, тип хәбәр итә Башҡортостан юлдаш телеканалы.

Дауахана 38 мең кешене хеҙмәтләндерә. Кадрҙарҙы йәлеп итеүгә килгәндә, бында реаниматолог, анестезиолог, хирург, офтальмолог, лор табиптар кәрәк.

Раевка үҙәк район дауаханаһы баш табибы  Венер Иҙекәев: “Быйыл Башҡорт дәүләт медицина университетында маҡсатлы программа менән уҡыған өс йәш белгестең ҡайтыуы көтөлә”, - тип белдергән.

Фото: Башҡортостан юлдаш телеканалы.