“Өләсәйемә ҡарап, мин дә медицина юлын һайланым”

Өфөләге медицина колледжында медицина һәм лаборатория анализы эшләү буйынса ярыштылар.

- Башҡортостандан, Ульяновск, Пенза өлкәләренән, Мәскәү ҡалаһынан барлығы 10 ҡатнашыусы беҙҙең майҙансыҡта үҙ көсөн һынай, - тип белдерҙе баш эксперт Анастасия Озерова. – Улар – лаборатория диагностикалауы белгеслеге буйынса студенттар һәм уҡыу йортон тамамлағандар. Улар дөйөм клиник һәм башҡа анализдарҙы эшләү буйынса үҙ көсөн һынай.

Карина Бәширова – Өфө ҡыҙы. Өләсәһе Йәмлиха Лотфулла ҡыҙы ярты быуаттан ашыу баш ҡалабыҙҙағы 8-се дауахананың лаборатория бүлексәһендә эшләгән. Әле ейәнсәре уның данлы юлын дауам итә.

- Ҡәҙерле кешемә ҡарап, мин дә медицина юлын һайланым. Чемпионатҡа килгәндә, ошондай сараларҙа бик ихлас ҡатнашам, - ти ул.

Софья Зимина – Өфө медицина колледжының IV курсы студенткаһы. Тырыш ҡыҙ спорт менән дә әүҙем шөғөлләнә. “Массажист булғым килә. Бындай сараларҙа иһә тәжрибәмде арттырыу, башҡаларҙың эшен ҡарау өсөн ҡатнашырға тырышам”, - ти ул.

Әйткәндәй, чемпионатта ирекмәндәр ҙә байтаҡ ине. Уларҙың береһе Глеб Холев – Мәскәү ҡалаһынан. “Үҙем былтыр Ҡазанда үткәрелгән ошондай уҡ сарала ҡатнашҡайным. Быйыл иһә ирекмән итеп һайлап алдылар”, - ти ул.

Айрат Нурмөхәмәтов фотолары.