Реабилитация саралары етештереүселәргә ярҙам күрһәтелә

Башҡортостан Башлығы Радий Хәбиров социаль селтәрҙәге сәхифәһендә реабилитация саралары етештереүселәргә ярҙам саралары тураһында яҙып сыҡты.

 “Кәртәләрҙе емереп” форумында инвалидтарҙы реабилитациялау өсөн ҡорамалдар етештереүселәрҙе үҙебеҙҙең “Сәнәғәт сәғәте”нә саҡырғайным, бөгөн беҙ уны үткәрҙек. Ошондай предприятиеларға булышлыҡ итергә тигән мөһим ҡарар ҡабул иттек.

Башҡортостанда техник реабилитация сараларын етештереүселәр – һигеҙ. Улар модулле протездар, ортопедик аяҡ кейеме, оҙаҡ ятып тән тишелеүенән һаҡлай торған матрас һәм мендәрҙәр, ҡул суҡтары өсөн тренажерҙар, дауалау физкультураһы һәм реабилитация өсөн ҡорамалдар, функциональ карауаттар һәм инвалидтарҙың тормошо өсөн кәрәкле башҡа ҡулайламалар сығара.

Шул уҡ ваҡытта республикала һәм бөтә илдә лә бындай ҡорамалдарға ихтыяж ҙур, айырыуса хәҙерге шарттарҙа, бер нисә сит ил аналогы Рәсәй баҙарынан киткән саҡта.

Ярҙам саралары комплекслы буласаҡ, улар бер юлы бер нисә министрлыҡ – Сәнәғәт, Хеҙмәт, Һаулыҡ һаҡлау, Эшҡыуарлыҡ министрлыҡтары һәм башҡалар аша тормошҡа ашырласаҡ.

Атап әйткәндә, яңы ҡорамалдар, сеймал, материалдар һатып алыуға субсидия бүлергә ниәтләйбеҙ. Башҡортостандың Сәнәғәтте үҫтереү фондынан йылына бер-өс процент менән өс йылға биш миллиондан 20 миллион һумға тиклем льготалы займ биреү хаҡында уйлайбыҙ. “Алға” махсус иҡтисади зонаһында, индустриаль парктарҙа, йылдам социаль-иҡтисади үҫеш биләмәләрендә етештереүҙе ойоштороу өсөн майҙансыҡтар һайлауҙа ярҙам итербеҙ. Федераль кимәлдәге конкурстарҙа ҡатнашыу өсөн документтар әҙерләү күп ваҡытты ала, был ғәмәлдәрҙе ҡулайлаштырырға ниәтләйбеҙ. Эске һәм тышҡы баҙарҙарҙа етештереүселәрҙең тауарын танытыу ҙа мөһим.

Ярҙам саралары киләһе йылдан ғәмәлгә инә, әле иһә бюджетты төҙөйбөҙ. Был тауар етештереүселәргә инвестиция күләмен икеләтә арттырырға, яңы эш урындары булдырырға мөмкинлек бирер, тигән фекерҙәбеҙ. Әммә иң мөһиме – мохтаждарҙың барыһын да сифатлы техник реабилитация саралары һәм тейешле ҡорамалдар менән тәьмин итәсәкбеҙ”, – тип яҙған Радий Хәбиров.

Фото: vk.com/radiyhabirov

Сығанаҡ: vk.com/radiyhabirov