Бында көслө команда, көслө етәксе

7 ноябрҙә Һамарҙа “Ватанды һаҡлаусылар” махсус хәрби операцияһында ҡатнашыусыларға ярҙам итеү дәүләт фонды филиалдары етәкселәре өсөн семинар-кәңәшмә тамамланды. Форум майҙансығында илдең барлыҡ 89 субъекты вәкилдәре махсус хәрби операция ветерандарын һәм уларҙың ғаиләләрен комплекслы оҙатыу һәм уларға ярҙам итеү мәсьәләләрен тикшерҙе.

Сарала статс-секретарь – Рәсәй Федерацияһы оборона министры урынбаҫары, “Ватанды һаҡлаусылар” фонды рәйесе Анна Цивилева, Рәсәй Президентының Волга буйы федераль округындағы тулы хоҡуҡлы вәкиле Игорь Комаров ҡатнашты.

Башҡортостан исеменән республика Премьер-министрының беренсе урынбаҫары Урал Килсенбаев, фондтың төбәк филиалы етәксеһе, республиканың Дәүләт Йыйылышы – Ҡоролтай депутаты Гөлнур Ҡолһарина сығыш яһаны.

Анна Цивилева бындай күсмә осрашыуҙарҙың көнүҙәк булыуын билдәләне һәм был эш дауам итәсәген белдерҙе:

“Беҙҙең команда даими үҫә, яңы бурыстар, саҡырыуҙар, хәл итергә кәрәкле мәсьәләләр тыуа. Был майҙансыҡ мөмкинлектәребеҙҙе тупларға һәм тәжрибә уртаҡлашырға, иң яҡшы тәжрибәләребеҙҙе трансляциялауға мөмкинлек бирҙе”.

Семинарҙа “Ватанды һаҡлаусылар” фондының йыл ярымлыҡ эшенә йомғаҡ яһалды: бөтә филиалдарҙан ярҙам күрһәтеүгә 1693000-дән ашыу һорау килгән, шуларҙың 1543000-дән ашыуы хәл ителгән. Эш йүнәлештәре күп – ул медицина, социаль, юридик ярҙам.

– Беҙҙең төп бурыс – кеше эшләй алһын, балаларын тәрбиәләү, ғаиләне тәьмин итеү, кәрәк булһа, яңы белем һәм компетенциялар, белем алыу мөмкинлеге булһын өсөн, махсус хәрби операция ветерандарын ресоциализациялау. Шулай уҡ Ватанды яҡлаусыларҙы патриотик тәрбиәгә, һәләк булғандарҙың хәтерен мәңгеләштереүгә йәлеп итеү мөһим, сөнки беҙ аталарыбыҙҙың, олатайҙарыбыҙҙың, ҡартатайҙарыбыҙҙың ғына түгел, хәҙерге геройҙарыбыҙҙың да батырлыҡтарын хәтерләйбеҙ, хөрмәт итәбеҙ. Фонд өсөн тәүге йыл үҫеш осоро булды, артабан хәрәкәт бөтөнләй яңы кимәлдә дауам итәсәк, – тип билдәләне Анна Цивилева.

Ватанды һаҡлаусылар һәм уларҙың ғаиләләре тураһында хәстәрлек Рәсәй Президенты Владимир Путин тарафынан федераль структуралар һәм төбәк власть органдары өсөн өҫтөнлөклө тип билдәләнә. Тап дәүләт башлығы ҡарары менән 2023 йылдың 3 апрелендә “Ватанды һаҡлаусылар” дәүләт фонды ойошторола.

Семинарҙа ҡатнашыусыларға Рәсәй Президентының Волга буйы федераль округындағы тулы хоҡуҡлы вәкиле Игорь Комаров та мөрәжәғәт итте.

– Ошо ваҡыт эсендә филиал етәкселәре һәм хеҙмәткәрҙәре ҙур эш башҡарҙы. Асылғандан алып Волга буйы федераль округы төбәктәренең филиалдарына 150 меңдән ашыу граждан мөрәжәғәт иткән, 300 меңгә яҡын һорау ҡаралған һәм уларҙың барыһы ла тиерлек хәл ителгән. Кешеләрҙең мөрәжәғәттәре төрлө мәсьәләләргә ҡағылды: социаль ярҙам, түләүҙәр, юридик ярҙам, хәрби хәрәкәттәр ветераны танытмаларын рәсмиләштереү. Был мәсьәләләрҙе хәл итеү тәү сиратта фонд иңенә төшә. Һәм һеҙ быны лайыҡлы үтәнегеҙ, – тине Игорь Комаров.

Тулы хоҡуҡлы вәкил шулай уҡ ил етәкселегенең, Дәүләт Думаһы депутаттарының һәм закондар сығарыу власы органдарының, губернаторҙарҙың әүҙем позицияһы һөҙөмтәһендә Фонд ҡарамағындағыларҙың мәсьәләләрен хәл итеү өсөн ҡануниәттәге күпселек административ кәртәләр һәм бушлыҡтар бөтөрөлдө, ведомство-ара хеҙмәттәшлек ярайһы уҡ яҡшырҙы, тип билдәләне. Волга буйы федераль округы төбәктәрендә хәрби хәрәкәттәр ветерандарын иң кәрәкле вакансиялар буйынса уҡытыу ойошторолған. Коммерцияға ҡарамаған ойошмаларға грант ярҙамы программаһына инвалидлығы булған махсус хәрби операцияла ҡатнашыусыларҙы яраҡлаштырыу һәм реабилитациялау буйынса йүнәлеш индерелгән. Хәрби хеҙмәткәрҙәргә һәм уларҙың ғаилә ағзаларына социаль ярҙам күрһәтеү механизмдары даими камиллаштырыла.

Игорь Комаров, “Геройҙар ваҡыты” президент программаһында ҡатнашыусыларҙың остазы булараҡ, сентябрҙә үткән һайлау йомғаҡтары буйынса 60 ҡатнашыусы төрлө кимәлдәге закондар сығарыу һәм вәкиллекле власть органдары депутаттары булды, ветерандар төбәк власть органдарында һәм муниципалитеттарҙа вазифаларға тәғәйенләнә, тип хәбәр итте.

Семинар-кәңәшмәлә филиал күп күрһәткестәр буйынса иң яҡшылар иҫәбендә билдәләнде. Төбәк филиалы етәксеһе Гөлнур Ҡолһарина Дәүләт фондының Почет грамотаһына лайыҡ булды.

Хәтерегеҙгә төшөрәбеҙ, төбәк филиалы Өфөлә 2023 йылдың 1 июнендә Минһажев урамы, 107 адресы буйынса асылды. Уның белгестәре махсус хәрби операция ветерандарына бөтә ярҙам сараларын, шул иҫәптән медицина һәм социаль реабилитация, дарыуҙар менән тәьмин итеү, психологик ярҙам, шулай уҡ кәрәкле техник реабилитация сараларын һәм шифахана-курорт дауалауын алырға ярҙам итә. Бурыстар иҫәбендә – хәрбиҙәрҙе ҡайтанан уҡытыуҙа һәм эшкә урынлаштырыуҙа ярҙам итеү, көнкүреш мәсьәләләрен хәл итеүҙә ярҙам итеү. Фонд шулай уҡ патриотик тәрбиә биреү, тарихи хәтерҙе һаҡлау буйынса йәмәғәт проекттарында ҡатнашыуға махсус хәрби операция яугирҙәрен йәлеп итә.

Эшләгән осорҙа филиалға 70 меңдән ашыу мөрәжәғәт килгән, шуларҙың 67 меңгә яҡыны хәл ителгән дә инде. Учреждениеның комплекслы оҙатыуында МХО ҡатнашыусылары, шулай уҡ һәләк булған яугирҙәрҙең ғаилә ағзалары тора. Филиал штатында – 97 социаль координатор, уларҙың туғыҙы – үҙәк бүлексәлә, 88 кеше республиканың барлыҡ муниципалитеттарында эшләй. Быйыл октябрҙә Өфөгә эш сәфәре барышында Анна Цивилева филиал коллективының эшен юғары баһаланы, шулай уҡ Ватанды һаҡлаусыларға республика ярҙам программаларын билдәләне.

– Хәҙер кешеләрҙең бик аҙ проценты ғына беҙгә махсус хәрби операцияла ҡатнашыу тамамланғандан һуң мөрәжәғәт итеүен аңлайбыҙ. Ә был яугирҙәр бер нисә тапҡырға күберәк буласаҡ. Адреслы ярҙам ғына түгел, ә ғәмәлдәге система төҙөргә әҙер булырға тейешбеҙ, ул кешене йәмғиәттән ҡыуып сығармаҫ өсөн тотоп аласаҡ һәм уның менән шөғөлләнәсәк. Сөнки был кешеләр үҙ ғүмерҙәрен һәм һаулығын аямай Ватаныбыҙҙы, дәүләтебеҙҙе һәм уның мәнфәғәттәрен яҡлай. Һәм беҙ уларҙы һәр ваҡыт яҡлаясаҡбыҙ. Башҡортостандағы филиал – үҙ периметрында йәмғиәттең бөтә йүнәлештәрен һәм власть органдарын берләштергән структура, – тип белдерҙе ул саҡта Анна Цивилева.

Башҡортостан Башлығы Радий Хәбиров, Өфөлә филиал эшен тейешле кимәлдә ойошторҙолар, тип иҫәпләй.

– Бында көслө команда, көслө етәксе. Төбәктәге бөтә идара итеү структуралары ла тәртипле эшләй. Күп яугирҙәрҙең бында мәсьәләләрҙе хәл итергә, сәй эсергә килеүен күрәм. Фонд улар өсөн, асылда, икенсе йортҡа әйләнә, – тип билдәләне Радий Хәбиров. – беҙ республикала һәр ваҡыт үҙебеҙҙең ойошма ағзаларына тәрән ихтирам менән ҡарайбыҙ, уларҙың ғаиләләренә ярҙам итәбеҙ. Өйгә ҡайтҡандар эшкә урынлашһын, яҡындарының барыһы ла яҡшы булһын өсөн барыһын да эшләйбеҙ. Уларҙың батырлығын бер ҡасан да онотмаясаҡбыҙ.

Фото: “Ватанды һаҡлаусылар” фондының төбәк филиалынан, Волга буйы федераль округынан.