Эшһеҙҙәргә ниндәй ярҙам саралары ҡаралған?

Күптән түгел эшһеҙ ҡалдым, хеҙмәт урыным ҡыҫҡартылды. Эшһеҙ ҡалғандарға ярҙам саралары бармы?

Фәнил.

 – Башҡортостандағы эшһеҙ граждандар түбәндәге ярҙам төрҙәренә өмөт итә ала:

1. Эшһеҙлек буйынса пособие. Уны республикалағы мәшғүллек үҙәгенә иҫәпкә торғандарға һәм эшһеҙ тип танылғандарға бирәләр. Пособие күләме стаж, эш хаҡы һәм йәшкә бәйле була. Башҡортостанда былтыр февралдән иң бәләкәй пособие – 1853 һум, иң ҙуры 15800 һум тәшкил итте.
2. Мәшғүллек үҙәктәре йүнәлтмәһе буйынса һөнәри йәки өҫтәмә һөнәри белем алыу ваҡытында түләнгән стипендия.
3. Эшһеҙлек буйынса пособиены түләү ваҡыты үтеүгә бәйле билдәләнгән матди ярҙам.
4. Үҙ эшеңде асыу өсөн бер тапҡыр бирелгән финанс ярҙам.

Әлеге ваҡытта мәшғүллек хеҙмәте эшһеҙ граждандарға 165 мең һум күләмендә бер тапҡыр бирелә торған финанс ярҙамы күрһәтә, былтыр йыл башынан алып уны 160 кеше алған. Шулай итеп, аҙ тәьмин ителгән граждандар, социаль килешеү төҙөп, үҙ эшен асыу мөмкинлегенә эйә: түләү күләме бизнес-план менән билдәләнә һәм 350 мең һумға тиклем тәшкил итергә мөмкин. Быйыл 1200-ҙән ашыу кеше социаль килешеү төҙөгән. Бынан тыш, өҫтәмә һөнәри компетенциялар кәрәк булғанда яңы эш башлаған эшҡыуар, 30 мең һумға тиклем курсты һайлап, бушлай уҡый ала. Ошо ярҙам  төрҙәренең барыһы менән дә мәшғүллек үҙәктәрендә тулыраҡ танышырға мөмкин.

Айрат Нурмөхәмәтов фотоһы.