Бала булған өйҙөң йәме бар

Баҡалы районында йәшәгән Айһылыу Флүр ҡыҙы Нәфисә, Розалина һәм Айгүзәл исемле ҡыҙҙарын һөйөп-ҡәҙерләп үҫтерә. Өлкәндәре хәҙер ғаилә ҡороп, айырым йәшәй. Айгүзәл 7-се класта уҡый

2018 йылда әсә тағы бер мөһим аҙым яһай: бер туған ағаһының улдарын тәрбиәгә ала. Айсыуаҡ менән Нурислам өсөн апайҙары иң яҡын кешеләренә әүерелә.

Хәҙер Нурислам Башҡорт аграр-технология колледжында уҡый.  Уға ҡәҙәр художество мәктәбен тамамлай, һүрәт төшөрөү менән шөғөлләнә. Айсыуаҡ гимназияла уҡый, волейбол менән мауыға, техника менән ҡыҙыҡһына, киләсәктә колледжға уҡырға инергә хыяллана.

Бер туғандарҙың шөғөлдәре лә уртаҡ: ҡышын саңғыла шыуырға, йәйен балыҡ ҡармаҡларға яраталар. Буш ваҡыттарында яңғыҙ өләсәй-олатайҙарға хужалыҡ эштәрендә ярҙам итергә әҙерҙәр.  

Айһылыу Флүр ҡыҙы оҙаҡ йылдар балалар баҡсаһында эшләй. Балалар менән дә, ата-әсәләр менән дә уртаҡ тел таба белеүе, яуаплы һәм киң күңелле булыуы өсөн уны хөрмәт итәләр.

Нурислам менән Айсыуаҡ хужалыҡта апайҙарының уң ҡулына әүерелгән, йәшелсә, емеш-еләк үҫтереүҙә, йорт хайуандарын тәрбиәләүҙә ярҙам итәләр.

Йәнбирҙиндәр ғаиләһе район сараларында һәм конкурстарҙа әүҙем ҡатнаша. Ә өйҙә уларҙы хәстәрлек, йылылыҡ һәм йәмле мөхит көтә. Балалар үҙҙәренең һөйөү менән солғанғанын, кәрәкле булыуҙарын яҡшы тоя –  был улар өсөн иң мөһиме.

Фото: Ғаилә, хеҙмәт һәм халыҡты социаль яҡлау министрлығы сайтынан.