Хеҙмәткә һәм илде һаҡларға әҙерһеңме?

Иҫке Балтас ауылындағы “Йәшлек” физкультура-һауыҡтырыу комплексынан кеше өҙөлмәй. Уның шулай булыуына аптырайһы түгел, сөнки бында етәкселек эште дөрөҫ ойошторған.

Әйткәндәй, ошо көндәрҙә унда республиканың 100 йыллығы хөрмәтенә Бөтә Рәсәй физкультура-һауыҡтырыу комплексының фестивале уҙҙы.

Балтас район Советы рәйесе, “Балтач таңнары” гәзитенең баш мөхәррире Рөстәм Вәлиевтең һүҙҙәренә ҡарағанда, ярышта 13 коллективтан 80 кеше ҡатнашҡан. Һәр кем ГТО нормативын үтәү өсөн бар көсөн һалған. Гер күтәреү, турникта күтәрелеү, урындан һикереү, электрон ҡоралдан атыу, йөҙөү һәм башҡа төрлө бәйгеләр – шуға асыҡ миҫал. Рөстәм Мәүләүи улы былтыр ГТО нормативтарын үтәгән сәмселдәргә “алтын” билдәләр тапшырҙы.

– Спортта алдынғылыҡты бирмәгәндәр хеҙмәт урындарында ла һынатмай, төбәктә олоһо ла, кесеһе лә сәләмәт тормош яҡлы, – тип һөйләй заманында һабантуйҙарҙа еңеп, йыш һарыҡ алған Ислам бабай.

Балтас районы.